Lene E.: Isertuussat allat saqqummiunneqariaannaapput
CIA-p parnaarussassanik timmisartuussisarsimanerminut atatillugu Kalaallit Nunaannut aqqusaartarsimanera pillugu, Danmarkip nunanut allanut ministeriata Lene Espersenip nassuiaataa, folketingimut ilaasortap Lars-Emil Johansenip qarsupittuunnginnerarpaa. Taamaattoq paasissutissat arlaannaannulluunniit attuumasssuteqanngitsunit misissorneqarnissaat kissaatigaa:
- Soorunami taakkua paasissutissanik erseqqinnerusunik pissarsiffiginissaat kissaatiginaraluarpoq, kisianni aamma kissaatiginaraluarpoq arlaannaannulluunniit attuumassuteqanngitsumit misissorneqarnissaat, Lars Emil Johansen oqarpoq, nangillunilu:
- Folketingimili ilaasortat amerlanerussuteqartut aalajangernerat najoqqutaralugu tamanna pisinnaanngilaq, taamaattumik oqallinneq inerneqanngitsoq pereersimasut pillugit oqallisigineqartuassaaq. Uanga soqutiginartinneruara qanoq iliornikkut taamatut pisoqaqqissinnaanera pinngitsoortissinnaaneripput, Lars-Emil Johansen oqarpoq, Nunatsinnullu tunngassuteqartunut Nunatta isumaqatigiissuteqartuunissaa ujartorlugu:
- Nunatsinni maanna Namminersulereerpugut, illersornissarlu pillugu isumaqatigiissut tunngavigineqartoq 1951-iminngaanneersoq pisoqalisoorujussuarnikoq atorunnaarlugu, Namminersorneq pillugu inatsimmi periarfissat, inuiattullu nammineq inuiaassusilittut piginnaatitaaffigut atorlugit isumaqatigiinniarnissarput isumaqarpunga pingaarnerujussuusoq, Lars Emil Johansen oqarpoq.
Nunanut allanut ministerip Lene Espersenip nassuiaataa, Lars-Emil Johansenip qarsupittuunngitsutut nalilerpaa, itisilerilluni nassuiaanissaq, apeqqullu pingaartillugu nassuiaasoqarnerarlugu.
Nunanut allanut ministeri Lene Espersen, Folketingip Nunanut allanut sillimaniarnermullu ataatsimiititaliaanut ullumi aggersarneqarpoq, CIA-p timmisartuussisarsimanera pillugu nassuiaateqaqquneqarluni.
Timmisartuussisoqartarsimaneq pillugu paasissutissat Danmarkip naalakkersuisuinit isertuunniarneqarsimanngitsut, Lene Espersenip erseqqissaatigaa.
Timmisartuussisarsimanerit pillugit Lene Espersenip Barack Obamap naalakkersuisoqataanut apeqquteqaateqarnissaanut ataatsimiititaliami ilaasortaasut ilaasa piumasaqaataat, Lene Espersenip akuersaanngilaa, paasissutissallu nutaat Wikileaksimit saqqummiunneqarsinnaanerat sillimaffigeqqullugu.
Kalaallit Nunaata Danmarkillu akornanni attaveqaqatigiilluartarnissaq taamaammat pingaaruteqartippaa:
- Wikileaks paasissutissanik suli saqqummiussisinnaammat isumaqatigiissutigaarput attaveqaqatigiilluartassalluta. Isertugassaateqanngilagut. Apeqquteqaateqartoqassappallu kajumissuseqarluta akiumaarpavut, Nunanut allanut ministeri Lene Espersen naggasiilluni oqarpoq.
Amerikamiut suleqatikkuminaassimanerat, Nunanut allanut ministerip ajuusaarutigaa.
