Lektori: Pisimasut qulaajarneqarlik
Misigisapiluit oqaluttuarisaanerup ingerlanerani aalajangiinerit kukkusut inunnut tutsinneqarsimasut. Taama inerniliivoq Canadami kommissioni 2007-mi pilersinneqarsimasoq.
Kalaallit Nunaata Danmarkillu akornanni assingusumik misissuinermik pisoqartariaqaraluarpoq. Taama isumaqarpoq Københavnip universitetiani eskimologeq, lektori Karen Thisted.
DR-ip ullaakkut aallakaatittagaani P1-mi Kirsten Thisted ullaaq oqarpoq Canadami inuit oqaluttuarisaaneranni Kalaallit Nunaanni assingusorpassuarnik peqartoq.
Nunatta oqaluttuarisaanerani soorlu avanersuarmi Qaanaarmiut pinngitsaalisaallutik nuutitaannikuupput, aamma tamanna Kalaallit Nunaanni allani pisarsimavoq, 60-ikkut 70-ikkullu ingerlaneranni nunaqarfinnik matooraanerit, Qullissat inuerutsitaanerat, aamma puigornagu Eksperimentet, meeqqat 22-it pinngitsaalillugit Danmarkiliartinneqarnerat. Pisimasut inuit qulaatiinnarlugit isumasioqqaarnagillu aalajangikkat, kisianni Canadami inuit saqqummersitaat tassaaginnanngillat pisimasut tigussaasut.
Kirsten Thisted isumaqanngilaq Danmarki utoqqatserpat ajornartorsiut anigorneqassasoq, kisianni aamma pitsaanerulernavianngilaq Danmarkip kukkussutigisimasani nassuerutigiumanngittuarpagit.
Ukiut 300-ut matuma siorna nunasiaqarsimaneq pillugu utoqqatserneq imaqanngilluinnassaaq. Utoqqatserpugut sivisuallaamik nunasiaateqartutut pissusilersorsimagatta, ilaatigut tamanna iperaruminaatsittarparput, tamanna ajunngitsumik isumaqassaaq, imaanngitsoq qallunaat misigiuassasut qanga pisimasunut pisuusutut.
-Kalaallit nalligiuarnissaannut misigisimanerit qatsutiivippagut, taakku naammaleqaat, kisianni politikerigut akisussaaffimmik tigusiumappata uagullu kalaallit qaallunaallu inuttut tamatta akisussaaffimmik tigusiumagutta, taava pissutsit kingornussarsiarisimasat qimakkiartuaalissagaluarpagut, akisussaaffimmik tigusinikkut pisuutitsiniarnerit qimallugit. Tassa ullumikkut kalaalerpassuit sammisaat: isummernissaq.
Naalakkersuisuni siulittaasoq oqartuarpoq taamatut pissusilersortuarneq, qallunaanik pisuutitsiniartuarneq atorsinnanngitsoq. Kalaallit eqqumiitsuliortut inuusuttut ilaasa nunasiaasimaneq sammilersimavaat, pissanganartunillu saqqummiisarlutik, saqqummiussaallu qernertuullutillu qaqortuinnaaneq ajorput, akornanniittullu qasertut saqqummersittarpaat, tassa imaakkami assaalluaraani paasinarsisarpoq annikitsuinnarmik qernertuinnaqarlunilu qaqortuinnaqartoq.
