Lektori: KNI-p pisortaanera politikkikkut soraarsitaavoq
- KNI-mi siulersuisut tamarmiunatik KNI-p pisortaanik, oqaraanni politikkikkut soraarsitsinerat killormut takutitsineruvoq. Tassami siulersuisut suliassaasa pingaarnersaraat, niuerneq aningaasarsiornerlu aallaavigalugit KNI-mut iluaqusiinissaq.
Coopenhagen Business School-imi lektori aamma Kalaallit Nunaannut tunngasunut ilisimasaqarluartoq, Lise Lyck taama oqarpoq.
KNI-p siulersuisuini siulittaasoq, Niels Thomsen radioaviisimut ippassaq ima oqarpoq.
- Suliap uuma ingerlanneqarnerani politikerimit ataasiinnarmilluunniit oqaloqateqarnikuunngilanga aamma politikerimit saaffiginnitoqarnikuunani. Aamma atorfilittanit aqunneqanngilagut naak taama oqartoqaraluartoq.
Niels Thomsen radioaviisimut ippassaq taama ilaatigut oqarpoq.
KNI-p pisortaata soraarsinneqarnerata kinguneranik siulersuisuni ilaasortat pingaaruteqarluartut, qallunaat arnat pingasut aalajangerput soraarsitsinermut peqataaniaratik, taamaalillutillu ingerlaannartumik siulersuisunit tunuarlutik.
Siulersuisut allanik taarserneqarnissaat maanna ajornarnerulissasoq, Lise Lyckip ilimagaa.
- Neriuutigineqaannarsinnaavoq KNI-mi siulersuisut qimaguttut taartsissaannik pikkorissunik aningaasarsiornikkullu ilisimasaqarluartunik allanik nassaartoqarnissaa, taamaanngippammi KNI-p aningaasarsiornikkut ingerlanneqarneranullu tamanna innarliiginnarsinnaavoq, KNI-muinnaanngitsoq Kalaallit Nunaannulli tamarmut.
Lise Lyckip naqissuseqqippaa KNI-p pisortaata, Claus Jensenip soraarsitaanera aamma siulersuisuni ilaasortat pingasut tassanngaannaq qimagunneri, KNI-p avammut kiinnertarneranut iluaqutaanavianngitsoq.
Coopenhagen Business School-imi lektorip aamma Kalaallit Nunaannut tunngasunut ilisimasaqarluartup, Lise Lyckip aamma oqaatigaa, Kalaallit Nunaanni pisussarpassuit aningaasarsiornissamut aqqutissiuisut eqqarsaatigiinnarlugilluunniit, Namminersornerullutik Oqartussat iluani toqqissisimannginnerit, soorlu soraarsitsiortornerit qaangerneqartariaqalersut, Kalaallit Nunaata pitsaasumik aningaasarsiornissaannaaluunniit eqqarsaatigalugu.