Leif Fontaine: Naalakkersuisut naleqqussaasariaqarput

KNAPK-mi siulittaasuusimasup, Leif Fontainep, Naalakkersuisut pinngortitaq pillugu ingerlatseriaasaat naammagittaalliutigaa. -Nunatsinni innuttaasut atuisullu ilisimasaat uumassusilinnik aqutsinermi Naalakkersuisut Inatsisartullu aallaaviginerusariaqalerpaat.

Tusagassiutitigut nalunaarummi tamanna erserpoq, aaffattassat pillugit agguataarneqarnerat Fontainep isornartorsiormagu.

- Aarrit pisarineqarsinnaasut amerlassusilerlugit piffikkaartumik kommunikkaartumillu agguaanneqarnissaat piniartunit kattuffimmiillu KNAPK-mit maannamut akuersaarneqarpoq. Piniartulli KNAPK-llu illuatungaatigut piumasaraat kitaani aarrit piniagaasarnerat ammaanneqassasoq marsip ulluisa aallaqqaataat aallaavigiunnaarlugu ukiup aallartinnera imaluunniit februaarip ulluisa aallaqqaataat aallaavigilerlugu.

-Tamanna soorunami innuttaasut atuisullu ilisimasaannik tunngaveqarpoq. Tassami pinngortitap silallu allanngoriartornera malitsigalugu, Kitaata sikuusarnera ukiuni makkunani allanngoraluttuinnarpoq annikilliartuinnarlunilu. Taamaammallu marsip qaammataani avataata sikua aarrit najortagaat avasissorujussuarmiittalernikuulluni.

- Pinngortitap silallu allanngoriartornera sutigut tamatigut oqallisaaqisoq nunatsinni innuttaasunut atuisunullu inuuniarnikkut annertuumik sunniuteqartoq tunngavigalugu innuttaasut atuisullu atugaannik Naalakkersuisut pissutsinut allanngoriartortunut naleqqussaasariaqarput. Pissutsimmi taamaaginnassappata oqartussaaqataaneq sumiginnarneqassaaq, Leif Fontaine allappoq.