Leif Fontaine: Katersuutsitsinissamut periarfissaqanngilaq

KNAPK-p immikkoortoqarfit piumasaqaataannut siulittasua, Leif Fontaine taama ualinut akissuteqarpoq

Nuummi aalisartut piniartullu peqatigiiffianniit ippassaq oqarput, saarulliit akiisa minnerpaaffilerneqarnissaat kattuffimmiit kigaappallaamik suliarineqartoq, aammalu siulittaasoq aalisarnermut piniarnermullu naalakkersuisumut maleruutiinnarpallaartoq.

Tamaammat immikkut ittumik ataatsimeersuarnissaq piumasaraat, piumasaqaallu immikkoortortaqarfiit arlallit ullumi taperserpaat.

Kisianni tamanna pisinnaanngitsoq, KNAPK-p siulittaasua Leif Fontaine ualimut allappoq.

- Maleruagassat malillugit periarfissaqanngilaq. Aamma immikkut ataatsimeersuarnissamut aningaasartuutissat 1 millionit koruunit tungaanut amerlassuseqarsinnaasut pigineqanngillat, siulittaasoq allappoq.

Kattuffik kigaappallaamik sulinerarlugu aammalu siulittaasoq Aalisarnermut piniarnermullu naalakkersuisumut maleruutiinnarpallaarnerarlugu, Nuummi immikkortortaqarfiup isornartorsiutai, Leif Fontainep partiilersornertut inuttarsiuinertullu taavai.

- Partiilersuunneq inuttarsiuinerlu tujorminarput akuersaarneqarsinnaanatillu, siulittaasoq allappoq suleqatigiinnissamillu kaammattuilluni.

- Sinerissap qanittuani inuussutissarsiorneq siumut aallariassappat inuiaqatigiit tamatta ataatsimoortariaqarpugut, kaammattuivoq.