LEGO fondenip nunatsinni kiserliortitaaneq akiorniarpaa
Nunarsuaq tamaat LEGO pinngussatut meeqqanit inersimasunillu ilisimaneqarlarpoq. LEGO-lli ingerlataani tusarsaannginnerusoq tassaavoq LEGO Fonden, aningaasat pinngussanik nioqquteqarnermi isertitat ilaat meeqqanut atugarliortunut atugassanngorlugit katersorneqartarfiat.
- Uatsinnut pissusissamisuuinnarsimavoq Mary Fondenip qinngasaaruttarneq pillugu suliniutaasa tapersersornissaat. Maani Danmarkimi aamma Naalagaaffeqatigiinnerup ilaani. Qinngasaaruttarnerummi meeqqat peroriartornerat akornusersinnaavaa allaat kiserliortunngortitsisinnaalluni. Uagullu suliniarnitsinni pingaartilluinnarparput tamatuma akiorniarnissaa, LEGO Fondenimi pisortaq Morten Monrad Aagaard oqarpoq.
Ulluni makkunani Kunngissap nulia Ilulissaniippoq Red Barnetimiit aamma LEGO Fondenimiit aallartitat peqatigalugit. Tassani qimerluuataarpaat Kammagiittami angusat tamannalu Mary Fondenip ukiut kingulliit arlallit tapersersorpaa.
- Suliniummi pingaartitat oqariartuutillu LEGO Fondenip pingaartitaanut assut assigupput. Uagut peqataaffigerusupparput meeqqat neriuutissaqarnerullutik kiserliortitaanatillu alliartornissaat kammalaateqarlutik avatangiisiminnillu tapersersorluarneqarlutik. Kammagiitta Danmarkimi iluaqutaalereerpoq tikeraarnissarpullu sioqqullugu ilisimatinneqarnerput malillugu suliniut Kalaallit Nunaanni ingerlalluarpoq, Morten Monrad Aagaard siornatigut nunatsinniittareersoq oqarpoq.
