Lea & Perrins inerteqqutaanngilaq

februaarip 22-at 2005 13:30

Miseraq Worcester Sauce miseqqallu allat qalipaammik Sudan 1-mik, kræfteqalissutaasinnaasumik akullit, inuussutissanut qullersaqarfiup nioqqutigeqqujunnaarpai.

Miserarli ataaseq, Lea and Perrins-imik meqqilik, TV-avisimilu ippasaq takutinneqartoq, qalipaammik taassuminnga akoqanngilaq, taamaattumillu inerteqqutaasunut ilaanani.

Pisiffiup pisortaa Michael Østergaard ilisimatitsivoq miseraq taanna Pisiffimmi, Pilersuisumi niuertarfinnilu Sparini nioqqutigineqartoq, erseqqissaatigaalu Worchestershire Sauce taanna qalipaammik pasineqartumik akoqanngimmat.

Nioqqutissat allat, qalipaammik Sudan 1-mik imaluunniit Sudan Rødimik akullit niuertarfinni nioqqutigineqaqqusaajunnaartut nioqqutissiorfinnit ilaatigut makkunaneerput:

Arla Foods, Jensen Foods, Kolding Salater, Bähncke aamma Crown-Food.

Saucit allattorsimaffiat tamakkiisoq takuneqarsinnaavoq Inuussutissanut Qullersaqarfiup nittartagaani: www.foedevarestyrelsen.dk.