Lauritz.com politiinut tunniunneqarpoq

Akitsorterussinikkut tuniniaasarfik Lauritz qimmit amiinik tuniniaasutut politiinut unnerlutigineqarsimavoq. Danmarkimi uumasunik illersuiniaqatigiiffimmeersup kalaallit qimmiata amia tuniniarneqartoq paasigamiuk narraatigisimavaa.
Allattoq Mads Lynge
januaarip 03-at 2008 07:37

- Qimmit qitsuillu suli uumasut amii tunisassiariniarlugit ameerneqartarput, paasiuminaatsipparpullu Lauritz.com-imiit isiginngitsuusaarneqartuarmat qimmit amiisa tuniniarneqarnissaat inerteqqutaammat, uumasunik illersuiniarnermi pisortaq Søren Kent Pedersen Nyhedsavisen-imut oqarpoq.

Qimmit qitsuillu amiinik Danmarkimut eqqussuineq, tuniniaaneq tunisassiornerlu 2003-mili oktobarip ulluisa aallaqqaataannili inerteqqutaalerpoq.

Uumasunik illersuiniaqatigiiffiup qimmit amiinik tuniniaasimasoq ilanngullugu politiinut unnerluutigaa.

Namminersornerullutik Oqartussat uumasut nakorsaannut pisortatut atorfilittaata, Lasse Holmip uumasunik naalliutsitsisoqarsimaneranik pasinnissalluni pissutissaqanngitsoq naqissuserpaa.

- Kalaallit Nunaanni qimmit qimoqqittussaajunnaaraangata aatsaat toqoriarlugit pissanik atorluaaniarluni amii suliarineqartarput, amiisalu tuniniarnissaat piinnarlugit qimmeqartoqarneq ajorpoq. Nunarsuatsinni nunami ataasiinnarmi qimmit qitsuillu suli uumasut ameerneqarnerarneqartarput, tamannali nunatsinnut tutsinniassallugu pisariaqanngilluinnarpoq, Lasse Holm oqarpoq.

Lauritz.com-imi akitsorterussinikkut tuniniaasarfiup ammit tuniniarunnaareerpai.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq