Lauge Koch-ip illua soorlu nutaarsuaq

Inge Bisgaard, Nunatta Katersugaasivianeersoq Tunup avannaarsuani sulinerminut atatillugu angalanermini illutoqqat ukiut 100-ut matuma siorna ulorianartorsioqalutik ilisimasassarsiortut illorisimasaasa nutarpasinnersaat siumorpaa.
septembarip 13-at 2012 04:59

Inge Bisgaard-imi angalanerminut atatillugu qanga piniartut illuaraat Tunup avannaarsuani nunarujussuami avinngarusimaqalutik siammarsimaqisut nalunaarsorniarsimavai. Illuaqqallumi ilai ukiuni 100-ni napasimaneri eqqarsaatigissagaanni suli nutarpasinneri tupinnaannarnerarpai.

- Sapaatit akunnerini pingasuni angalaaratta sineriak 1800 kilometerinik isorartutigisoq umiatsiamik pullattakkamik angallavigaarput. Illuaqqallumi piniartut taamanersuarli sanaarisimasaat takullugit misigisaavoq imaannaanngitsoq. Illuaqqammi atortut taamani tigussaasut, soorlu umiarsuit umiunikut qisuttai, taquassaasiviit qisuttaalu atorneqarajuttarsimapput, Inge Bisgaard oqarpoq.

- Lauge Koch-immi illuaraa Ørnereden, Ella Ø-miittoq tikikkatsigu illuaqqap iluani amusariaq alakkariallaripput Lauge Koch-imut allatarisimasai suli tassaniittut, ilami illuaqqat suli nutarpasinneri tupaallannarpulluunniit. Nannummi tamaaniittut kisiartaallutik serlersaarisuusarsimammata, Inge Bisgaard oqarpoq.

Taamaammat illuaqqat nalunaarsorneqarput, atortorissaarutillu digitaliusut atorlugit uuttortarneqarlutik. Illuaqqammi mikisuarannguupput, tassalu 4,5 aamma 7 kvadratmeterinik annertussuseqaannarlutik. Asuliinnaanngitsorli mikisuaraapput, tassami mikineri Tunup avannaarsua issilillaraangat kiassartikkuminarnerutittarmatigit.

- Sirius-imi alapernaarsuisuusimasoq Peter Schmidt Mikkelsen angalaqatigeriaratsigu iluaqutigeqaarput, taassumami illuaqqat tikitavut tamavimmik oqaluttuassartai ilisimalluartuuai, Inge Bisgaard oqarpoq.

Aamma sanaartugassanik ilusilersuisartut marluk angalaqatigaavut, tassalu taakku peqatigalugit illuaqqanik nunarsuarmik eriagisassamiittunik nalunaarsuinivut tamarmik suliareqqinneqarnerini peqataassallutik. Illuaqqat ilaatigut umimmaat meqquinik oqorsarneqarsimasut takullugit alutornarluinnarput, asulu illuaqqat taakku ullutsinni ujarassiuut tamaani ilisimasassarsioraangata suli atortaraat paasinarluni. Aamma Sirius-imi alapernaarsuisartut illuaqqat taakku suli atorluartuuaat, naallu ukiuni 100-ni napareeraluartut suli pingaaruteqaqalutik. Inge Bisgaard, nunatsinni illutoqqat eqqissisimatitat pillugit nalunaarsuinermut inspektøriusoq taama oqaluttuarpoq.