Lars Svendsen nassaarineqarunarpoq
- Qimmimik aneerussisup angutip timaa sissamiittoq ualeq manna nassaaraa, Jyllandip avannaani politiineersoq Karsten Kristensen tusagassiuutinut taama nalunaaruteqarpoq.
Timip nassaarineqartup 28-nik ukiullip Lars Svendseniunissaa politiit ilimagilluinnarpaat.
Apriilip 14-ianni ullaaralaakkut inuk Limfjordip ikaartarfianiit nakkanngikkuni pissittoq inuusuttut pingasut takummassuk, politiit kalerrereeraallu ujaasinersuaq aallartippoq.
Inuusuttut isiginnittut oqaluttuarnerat naapertorlugu, inuk nakkartoq takuniariarlugu suaartarsimagaluarpaat, suaartagaalli sarfaatsitipallalluni aanngarsimavoq kingornalu takuneqaqqinnani.
Tamatuma kingorna qulimiguulik, aqqartartut, angallatit minnerunngitsumillu Lars Svendsenimut ilaqutaasut ikinngutaasullu Aalborgimeersut Nuummeersullu ujaaserrakkaluarput, naninaguli.
Lars Svendsen sapaatip akunnera ataaseq ujaarineqareersorlu arnaata sapilerluni ujaasineq unitseqquinnarsimavaa. Ullumili Lars Svendsenip timaa tassa nassaarineqartoq, politiit nalunaarutigaat.
