Lars Mathæussen: Allamiut piniarnermik aalisarnermillu ilinniartinneqaqqaartarlik

Nunanit allanit nunatsinnut suliartortut, aatsaat ukiut pingasut nunatsinni najugaqareersimagunik inuussutissarsiutiginagu aalisartalersinnaanissaat piniartalersinnaanissaallu, Inatsisartunut ilaasortap Lars Mathæussenip siunnersuutigaa.
Allattoq Dorthea Johansen
apriilip 25-at 2014 03:49

Nunani allamiut nunatsinnut suliartorlutik nunatsinniileraangamik, ilaasa sunngiffimmi aalisarneq piniarnerlu aallutilertarpaat. Tamanna periarfissaq killilersorneqartariaqartoq, Inatsisartunut ilaasortaq Lars Mathæussen isumaqarpoq.
 
- Nunatsinni piniartorpassuaqarpoq nunanit allaninngaanniit tikeraanit inangerneqarlutik misigisimasartunik. Assersuutigalugu tuttunniarnerput aallartikkaangat piniaqatigalugit aallartittarpugut. Taamaalillutalu inuussutissarsiutitsinnit piiaffigineqarluta misigisimasarluta. Piniakkanut tunngassuteqartoq inooqataaffigisarput ataqqinerusariaqarparput. Nunanimi allani taamatut ingerlaqatarnissatsinnut periarfissaqanngilagut. Kisiartaavugut nunarsuarmi ammasorujussuarmik pinngortitap uumasuinik atuisuusugut, Lars Mathæussen oqarpoq.
 
Taassuma siunnersuutigaa nunatsinnut suliartortut tikinnerminnit ukiut pingasut qaangiunnissaata tungaanut nunatsinni aalisarneq, piniarneq imartatsinni nunallu timaani angalasinnaaneq sillimaniarnerlu pillugit ilisimasaat qaffassaqqaarneqartassasut.
 
- Piniartut ilinniartitsisussatut inissisimareerput. Ilaqarpugummi ukiut 50-it imartatsinni atuisimasunik. Ilinniartitsisorissallugit pitsaanerpaajupput. Nunarsuarmilu pikkorinnerpaatut taasinnaavagut, ulluinnarni inuunerigamikku. Nunatsinnullu tikittut ataqqinerusariaqarpagut. Ajutooratarnissaannut isumaalugisarpagut, taamaattumik ilisimasariaqarpaat nunarput qanoq ittuusoq, Lars Mathæussen oqarpoq.
 
Nunanit allanit nunatsinnut suliartortut ukiut pingasut ingerlanerani aalisartunit piniartunillu qanoq aalisakkat tisanissaaannik, tuttut qanoq aattornissaannik, anorersuartussaatillugulu toqqup qanoq napparneqarnissaanik ilinniartinneqartarnissaat Lars Mathæussenip siunnersuutigaa.
Sumilu ilinniartinneqartassanersut eqqarsaatigereerpaa.
 
- Unnukkut atuartitsineq atorneqarsinnaavoq. Periarfissaqarpallu ilinniarusuttut ingerlanneqarumasarsinnaapput. Imaluunniit atuartitaanerup annertoorujussuunngikkaluartup iluani aamma eqaatsumik aaqqissuussisoqarsinnaavoq, nunatsinnimi inuuneq sakkortoorujussuusinnaasarpoq aamma sillimaffigineqartariaqarpoq inunni taakkunani, Lars Mathæussen oqarpoq.
 
Siunnersuut akuerineqassappat ilinniartitsineq qanoq aningaasartaqassanersoq aatsaat suliarineqassaaq.
 
Naalakkersuisut inatsimmut allannguutissatut siunnersuusioqqullugit peqquneqarnissaannik siunnersuut, Aalisarnemut Piniarnermullu Naalakkersuisup siunnersuutip akuerineqarnissaa inassutigaa.

Tassanilu piniarneq aallaaniarnerlu pillugit inatsisip allanngortinnissaa pisariaqarsoraa, aalisarnermulli inatsisip allanngortinnissaa pisariaqarsorinagu. Nunatsinnut nuussimasut, aatsaat ukiut marluk nunatsinni najugalittut nalunaarsorneqaqqaarsimagaangata aatsaat piniarnissamut akuersissummik tunineqartarmata.