Lars Løkkep EU-mi ministereqatini appisaluuppai
Silap pissusaata allanngoriartorneranut atatillugu iliuusissanik ministereqatini kinguaattooqqavallaarnerarpai, maannangaarlu iliuuseqaqqullugit.
Danmarkip Radioata nittartagaani tamanna atuarneqarsinnaavoq.
- Silap pissusaata allanngoriartorneranut atatillugu EU-p iliuuseqarniarnermi siuttuunini attattariaqarpaa. Silap pissusaa pillugu Københavnimi qaammatit arfinillit qaangiuppata ataatsimiinnissaq eqqarsaatigalugu iliuusissanik takussaasunik EU piareersimatitaqartariaqarpoq. USA aamma Australia piariilereerput, taamaammat EU aamma iliuuseqartariaqarluni, ministeriuneq Lars Løkke Rasmussen oqarpoq.
Anguniakkat pingaarnerit suussanersut EU-mi isumaqatigiissutigineqareerput, aningaasartuutissalli pillugit isumaqatigiinngittoqarluni.
Kikkummi akiliinerussappat? Polen assersuutigineqarsinnaavoq, tassami CO2-mik aniatitsinerpaanut ilaagami. Ajornartorsiulli tassaavoq akiliinissamut akissaqannginnami.
Ajornartorsiutit Bruxellesimi ullumi ataatsimiinnermi aaqqiivigineqarnavianngitsut Lars Løkke Rasmussenip qularutiginngilaa, EU-mili siuttut oktobarimi ataatsimiinnissaat eqqarsaatigalugu isumaqatigiittoqartariaqartoq ministeriuneq isumaqarpoq, Københavnimi decembarimi ataatsimiinnissami isumaqatigiittoqarsinnaanissaa taamaasilluni anguneqarsinnaalissagunarmat.
