Lars Løkke Rasmussen ingerlalluarpoq
Ministeriuninngortup ullut 100-t eqqissisimasumik inissiffissarsiorlunilu, siulerisami naalakkersuinikkut anguniagai ingerlateqqippai. Aamma immikkut ilisimasallit isumaqatigiissutigaat Lars Løkke Rasmussenip ministeriunertut piffissaq siulleq ajornartorsiorpallaarani atorsimagaa.
- Ataannarsinnaanini aalajaatsuunerlu annerusumik iliuuseqanngikkaluarluni qulakkeerpai. Piffissami tamatumani mianersorluni tusagassiuutitigullu saqqumilaarpallaarani ingerlatsivoq, tamakkuli tunuatungaanni naalakkersuisuni pilersaarummik ingerlataqarpoq, immaqa piviusungortikkuminaatsumik, tamannalu kingusinnerusukkut saqqummiunneqassaaq, taama oqarpoq Kasper Møller Hansen, Københavnip Universitetiani lektoriusoq.
Mianersortumillu ingerlatsineq iluatsippoq. Tassami qinersisartunik isumasiuinermi Venstret ministeriunerutitaat - akerlilersortaasa nuannarinngeqisaannik - nuannarineqaleraluttuinnarpoq.
Piffissami aggersumi kommuninut qinersinermi silallu pissusaa pillugu Københavnimi ataatsimeersuarnissami qanoq piginnaaneqartiginini qallunaanut takutinniartussaavaa.
- Aasami sulinngiffeqarnerup kingornagut naalakkersuisut pitsaasumik oqaluuserineqarnissaat pingaaruteqartorujussuuvoq, tassami qanittukkut kommuninut qinersisoqartussaavoq, tamannalu naalakkersuisut illuatungiliuttullu nuna tamakkerlugu kommunini qanoq taaguunneqartiginissaannik takutitsisussaavoq, Kasper Møller Hansen oqarpoq.
