Lars Løkke piaaraluni takkutinngitsoornerarneqarpoq

Lars Løkkep Kalaallit Nunaannut angalanini pissutigalugu Naalagaaffeqanngitsut pillugit kommissionimi killisiorneqarnissani kinguartissimavaa, naak aqaguttoq angerlareersimagaluarluni.
Allattoq Elisa Isaksen
maajip 27-at 2013 06:26

Danmarkimi ministeriunerusimasoq Lars Løkke Rasmussen, Danmarkimi naalagaaffinnut innuttaaffeqanngitsut pillugit isumalioqatigiissitami aqagu apeqqarissaarfigineqaleruni, pilersaarutigineqaraluartumit sapaatip akunneranik ataatsimik kingusinaarluni apeqqarissaarfigineqassaaq.
 
Tassami taassuma Nunatsinnut angalasussaanera pissutigalugu allamik ulluliisoqartariaqarsimagami.
 
Danmarkimili nutaarsiassaqartitsiviit ullumi oqaatigaat, piareersarnissaminut piffisaqarnerujumalluni angalanini utoqqatsissutigisimagaa. Tassami Lars Løkke Rasmussen apeqqarissaarfigineqarnissaminut pilersaarutaareersoq ulloq sioqqullugu unnukkut angerlamut apuutereersimammat.
 
Lars Løkkep ullormi apeqqarissaarfigineqarfissaraluani siornatigut ministeriuneqarfimmi pisortaasimasoq Karsten Dybvad oqaluttuarpoq, 2009-mi ukiakkut taamani ministeriunerusoq ilisimatikkini, naalagaaffinnut innuttaaffeqanngitsut Nunasisunut ministeeriaqarfimmi suliarineqarnerat ajornartorsiutitaqartoq, Ekstra Blademi tamanna allaaserineqarpoq. Lars Løkkep siusinnerusukkut oqaatigereerpaa, pineqartoq tusagassiorfinni sammineqalermat aatsaat ilisimasaqarfigilerini.
 
Lars Løkkep illersuisuata, eqqartuussissuserisup Nicolai Mallet-ip aviisimut Jyllands-Postenimut nassuiaatigaa, kinguartitsineq eqqumiigisariaqanngitsoq, angalanissammi ulluisa qulakkeerneqarnissaat sioqqullugu qinnuteqaatigineqareermat.
 
Taassuma Nunatsinnukarneranut pingaarnertut pissutaavoq, Nuummi Hotel Hans Egedemi oqalugiartussaanera, tamatuma saniatigut Lars Løkkep Naalakersuisunut ilaasortaq Karl Lyberth naapippaa Issittumilu Sakkutooqarfik pulaarlugu. Lars Løkke pineqartoq pillugu Danmarkimi tusagassiuutinut oqaaseqarusunngilaq.