Lars Larsen toquvoq

Lars Larsenip qaniginerpaasani najortigalugit angerlarsimaffimmini Silkeborgip eqqaaniittumi ullaaq toqukkut qimaguppoq, niuertarfeqarfiutaa jysk tusagassiuutinut taama nalunaaruteqarpoq.

- Ataatarput, ueq aataa Danmarkimilu assissaqanngitsumik niuertoq ullaaq annaavarput.

Tamatsinnit maaqaasissaqarput, annaasarput aliasuutigeqaarput, inuunerminilu imaannaanngitsumik suliaa sapinngisatsinnit ingerlateqqinniarumaarparput, Lars Larsenip ernera Jacob Brunsborg taama oqarpoq.

Lars Larsen Groupip siulersuisuini Jacob Brunsborg junimi siulittaasunngorpoq ataatani Lars Larsen taarserlugu.

Lars Larsen tingumminik kræfteqarnini pissutigalugu siulittaasuuffik ernerminut ingerlateqqippaa.

Lars Larsenip niuertarfiutini siulleq Aarhusimi 1979-mi ammarneramiulli kingorna niuertarfiit jyskit nunarsuaq tamakkerlugu 2.700-it ammarneqarput. Tassalu ukiut 40-it ingerlaneranni ullut tallimat qaangiukkaangata niuertarfimmik nutaamik ammaasoqartarpoq.

Lars Larsen Danmarkimi pisuunerpaat sisamat ilagaat, 30 milliarder koruunillu missaannik amerlatigisunik aningaasaateqarluni.