Qineqqusaarneq: Lars Løkkep nunarput ministeriminut sammeqqunngikkaa

Nunatsinni qineqqusaartoqarnerata nalaani apeqqutit nunatsinnut tunngasut danskit naalakkersuisuinit eqqartoqassanngillat. Lars Løkke Rasmussen allakkani Danmarkimi ministerinut nassiunneqartuni taama allappoq.
Assi © : Martine Lind Krebs/Det Grønlandske Hus i København
Allattoq Kenneth Elkjær
marsip 13-at 2018 08:14
Nutserisoq Simon Uldum -

Ministeriuneq allakkamini allappoq nunatsinni qineqqusaartoqarnera danskit tungaannit akuleruffigineqannginnissaa pingaaruteqartoq.

- Sammisat qineqqusaarnermi atorneqarsinnaasut pillugit naalakkersuisutigoortumik imaluunniit atorfilittatigoortumik Kalaallit Nunaannik peqataaffigineqartumik ataatsimiittoqassanngilaq, ministeriuneq taama allappoq erseqqissaatigalugulu tamanna aamma folketingimut ilaasortanut nunatsinneersunut Aaja Chemnitz Larsenimut Aleqa Hammondimullu atuuttoq.

Camp Century pillugu marlunngornermi isumasioqatigiinnissap taamaatiinnarneqarnerata kingorna taama nalunaaruteqarpoq.