Lars Løkke Rasmussen Venstremi siulittaasutut tunuartussaq
Ministeriunerusimasup Lars Løkke Rasmussenip siulittaasullu tulliata Kristian Jensenip atuuffimminninngaanniit tunuarniarlutik ullaaq manna nalunaarutigimmassuk tamanna paasinarsivoq.
Venstremut ilaasortarpassuit partiip siuttuisa taarserneqarnissaannik piumasaqarmata, partiimi piffissami kingullermi aalassassimaartoqartorujussooreersoq taama pisoqarpoq.
Venstremut ilaasortat immikkut ittumik Herningimi septembarip ulluisa 21-anni ataatsimeersuarunik siulittaasumik nutaamik taavalu siulittaasup tullianik nutaamik qinersissasut, Venstremit tusagassiuutinut nalunaarummi paasissutissiissutigineqarpoq.
Venstrep politikkikkut oqaaseqartartua, Jakob Ellemann-Jensen, Lars Løkke Rasmusenimut taartissatut ilimanarnerpaatut taaneqartarpoq.
Siulittaasutulli qinigassanngortinniarnerluni arfininngornermi ualikkut oqaaseqarfigerusunngilaa.
/ritzau/