Lars Emilip utaqqisut avaqqutiinnarpai

Utaqqisuni normu 70-iuvutit. Nuummi Dronning Ingridip Napparsimmaviata nakorsiartarfianut oqarasuaatikkut saaffiginnikkaanni ilaatigut taama pisoqarsinnaasarpoq.

 Nakorsiartarfiup oqarasuaataanut ullaakkut nalunaaqutaq arfineq-pingasut qaangerlugit tanneq pingasuniit qulingiluat tungaannut saaffiginnittoqarsinnaavoq, saaffiginninnermili utaqqineq Naalakkersuisunit akeqarunnaarsinneqarmalli utaqqineq sivisunerulersimavoq.

Tassa imaappoq: Innuttaasut nakorsamik oqaloqateqarnissaminnut saaffiginnikkaangamik utaqqisariaqartarput. Inatsisartunulli siulittaasuugaanni periarfissat allaanerugunarput.

Inatsisartut siulittaasuat Lars Emil Johansen isimigut sapaatip akunnerata naanerani ippigusulerami, nakorsiartarfiup normuanut sianinngilaq, Peqqissutsimullu Naalakkersuisumut Steen Lyngemut saaffiginnissimalluni, periarfissallu suunersut paasiniarlugu.

- Isiga aseruuttoorami, taannalu isumaqarama aamma pingaaruteqartoq Inatsisartuni sulinera unitsinngikkaluarlugu takutikkiartornissaa takutikkiartorsimavara, Inatsisartut siulittaasuat Lars Emil Johansen oqarpoq.

Taanna isimigut ippigusulerami Peqqissutsimut Naalakkersuisumut Steen Lyngemut saaffiginnippoq, periarfissat suunersut paasiniarlugu. Steen Lynge, Dronning Ingridip Napparsimmavissuanut toqqaannartumik kingorna saaffiginnippoq, Inatsisartullu siulittaasuat nakorsiartarfimmut sisamanut qiteqquttoq ornigussinnaanngorpoq, nakorsamillu tassani misissorneqarsinnaasimalluni.

Inatsisartulli siulittaasuat innuttaasunut allanut sanilliullugu immikkut ittumik sooq pineqassanersoq apeqqutaalerpoq, allatulli nakorsiartarfiup normuanut sianiinnarsinnaannginnersoq apeqqutaalerluni:

- Nakorsiartarfiup normuanut sianertariaqartoq isumaqarpunga, atorfilittannullu taamaallaat innersuuppara, periarfissat suunersut paasineqarsinnaaniassammat, Peqqissutsimut Naalakkersuisoq Steen Lynge oqarpoq.

Utaqqisitsisimasutulli paasineqarsinnaanera, Lars Emil Johansenip utoqqatsissutigaa:

- Utoqqatserpunga taamatut paasineqarsinnaasumik iliorsimagama, kisianni uanga taamatut utaqqisut qaangiinnarlugit arlaannilluunniit iliuuseqanngilanga. Tassa nakorsiartarfimmukarama utaqqisoqanngiivippoq. Sisamanut qiteqquttoq ammarpoq, ammarmallu kiserramma takananiippunga. Utaqqisunik illuartitaqanngilanga soorunami.  Kisianni kissaatigaara isiluutima soorunami piaartumik takuneqarsinnaanissaa, taannalu pillugu nakorsiarpunga, Inatsisartut siulittaasuat Lars Emil Johansen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat