Lars-Emilip igaataa errugassaq nunatta karsianut millionip sisamararterutaanik naleqartoq
Inatsisartut siulittaasuata Lars-Emil Johansenip Nuup pigisaani Qinngutsinni siulittaasutut illu najugaqarfini 2014-imi oktobarip qaammataani unnukkut pisassaqarluni qimappaa.
Nalunaaquttap akunnera ataaseq qaangiuttoq uterami illuata natia masaannaavoq, igaq errugassaq kinisimatissimammagu.
- Igaq kalaaliminiliorlunga atugara kinisimatippara, aniniarlungalu ulappuseriarama imeq kuutsiinnartoorlugu. Nalunaaquttap akunnera qaangiuttoq angerlamut uterama igaffiup natia masaannaavoq, Lars-Emil Johansen taama oqarpoq.
Allamut nuuttariaqartoq
Inigigallagassaminut aqaguani nuuttariaqarpoq, siulittaasullu illuata innarlerneqarnerata iluarsartuunneqarnerani ukioq ataaseq tassani najugaqarpoq.
Erngup innarliinera Lars-Emil Johansenip Facebookikkut nammineq siornatigut allaaserisimavaa, ajutoorninilu aviisimut AG-mut aamma oqaluttuarisimallugu. Inissialli taama annertutigisumik innarlerneqarnera qanoq naleqarnersoq aatsaat saqqummiunneqarpoq.
Illuarsartuussinerit katillugit 960.421 koruuninik naleqarput. Namminersorlutik Oqartussat sillimmasiisarfiannit 710.421 koruunit akilerneqarput, sillimasertinnermilu nammineq taarsigassaq 250.000 koruuninik aningaasartaqartoq Namminersorlutik Oqartussat akilerpaat.
Tulluusimaarutissaanngitsoq
Lars-Emil Johansen naapertorlugu, Namminersorlutik Oqartussat aalajangiinerisigut illumi naqqit tamaasa taasersersorneqarput allatigullu aamma iluarsartuussisoqarluni. Taakkununngali aningaasartuutaasut 960.421 koruunit ilaginngilaat. Aningaasammi taakku erngup innarliinerata iluarsartuunneqarneranuinnaq atorneqarput, Namminersorlutik Oqartussat KNR-imut taama ilisimatitsipput.
Ullumikkullu - ukiut marluk ingerlareersut - Siumumi naalakkersuisunilu siulittaasuusimasoq Qinngutsinni siulittaasup illuanut utereersimalerpoq. Ajutoorneq tassungalu aningaasartuutaasut ajuusaarutigalugit oqaatigaa.
- Soorunami imermik innarliisoorsimanera tulluusimaarutiginngilara. Soorunami aamma piaaralunga taamaaliunngilanga.
