Lars-Emil: Århusip kalaallinut qanillattornera pissusissamisuuginnarpoq
Folketingimut ilaasortap Lars-Emil Johansen-ip Århusillu borgmesteriata Nicolai Wammen-ip ippassaq ataatsimeeqatigiinneranni kalaallit inuuniarnermikkut ajornartorsiutillit oqaloqatigiinnerni qitiutinneqarput, kalaallillu ajornartorsiuteqanngitsut aamma sammineqarlutik.
Allattoq Louise M. Kleemann
aggustip 14-at 2008 08:22
Århusip Kalaallit Nunaannut qaninnerulersinneqarsinnaanissaa siunertaralugu kalaallit ajornartorsiuteqanngitsut peqataatinneqarsinnaanissaat ujartorneqarpoq:
- Århus iliuuseqarusuppoq, aamma ukiut tamaasa Århus Festugeqartarpoq tusaamasaasorujussuarmik. Taassuma pissuseqatigisaanik ukiumoortumik Kalaallit Nunaannut tunngasumii aaqqissuussisoqarsinnaanera borgmesterip soqutiginartippaa. Aamma isumaqarpunga Århusip Kalaallit Nunaatalu suleqatigiinnerisa annertusarnissaat sorpassuarnik periarfissaqartoq, Lars-Emil Johansen oqarpoq.
Kalaallit 1000-it missaat Århusimi najugaqarput, 120-llu missaat inuuniarnermikkut ajornartorsiuteqartutut nalilerneqarsinnaallutik.
