Lars-Emil: Toqqaannartumik oqaloqatigiissinnalernissaq qilanaarnaq

Danmarkip nunattalu silaannartaani CIA-p timmisartuussisarsimasinnaanera, Danmarkip aamma USA-p nunanut allanut ministeeriaqarfiini suliarineqarpoq. Siumut sinnerlugu folketingimut ilaasortap Lars-Emil Johansenip Kalaallit Nunaata USA-llu toqqaannartumik oqaloqatigiissinnaalernissaat qilanaaraa.
oktobarip 24-at 2008 10:42

- Kalaallit Nunaat Danmarkilu qanorluunniit ikinngutigiilluartigigaluarpata, nunatta USA-llu akornanni toqqaannartumik attaveqaqatigiittoqalernissaa pitsaanerussaaq, Lars-Emil Johansen oqarpoq.

Suleqatigiissitami nalunaarusiamik ippassaq saqqummiussisumi, Namminersornerullutik Oqartussat ilaasortaatitaqarput, kisianni nunatta USA-mut attaveqarnera aatsaat Danmarki aqqutigeqqaarlugu pisarpoq. Taamaattumik siunissami timmisartuussisarnissat pillugit isumaqatigiissutissaq pillugu nunanut allanut ministerip Per Stig Møllerip Amerikamiut nunanut allanut ministeriat Gondoleezza Rice pingasunngormat unnukkut oqarasuaatikkut oqaloqatigaa.

Lars-Emil Johansenip Nuup Washingtonillu akornanni oqarasuaatikkut attaveqatigiittoqalernissaa qilanaarnartutut oqaatigaa.

- Neriuutigeqaara qanittukkut Kalaallit Nunaata USA-llu pissutsit oqaloqatigiissutigisinnaalissagaat. Ilaatigut Pituffimmi pissutsit tusagaqarfigisinnaaniassagatsigik. Tamatumami annerusumik paasisaqarfiginissaa kissaatiginartutut isigigakku, Lars-Emil Johansen naggasiivoq.