Lars-Emil: Pilersaarusiornissaq aallartittariaqalerpoq
Kalaallit Nunaata qallunaat naalagaaffianiik aningaasatigut tapiissutinik pisarunnaarnissaa qilanaarnarpoq, taamaattumik Kalaallit Nunaata aningaasatigut qanoq ililluni nammineerluni napatissinnaalernissaa pillugu piareersarneq aallartereertariaqarpoq - uuliamut quaattoqannginnerani, taama isumaqarpoq folketingimut ilaasortaq Lars-Emil Johansen, Siumut.
- Folketingimi ilaasortatut oqaatigerusuppara isumaqarma maannakkut oqaluuserisassaq tassalertariaqartoq qanoq iliussanersugut uulia qallorneqalissappat aammalu nunarput aningaasatigut isaatitsilissappat, taamaalillunilu aamma bloktilskudi pisariaqartikkuunnaariartorneqalissappat - taannalumi qilanaarnaqaaq bloktilskudemik isumalluuteqaannarunnaariartornissaq. Periarfissat assigiinngitsuupput, namminiilivinnissaq siunnerfigineqassappat taava pilersaarusiorluartariaqarpoq, aammalu uuliap tamarmi qalloreernissaa utaqqinagu uuliamut quaattoqannginnerani isumaqarpunga oqaluuseralugu aallartereertariaqaripput. Piffissaqarluarpugut paasisakka najoqqutaralugit ukiualussuarni suli, Lars-Emil Johansen oqarpoq.
Kalaallit Nunaata Qallunaallu Nunaata akornanni siunissami attaveqatigiinneq qanoq ittuussanersoq piareersarneqalereertariaqartoq Lars-Emil Johansen isumaqarpoq.
- Naluara oqaaseq atorneqarsinnaanersoq annakkuummernarpoq, kisianni nuannaajallannarpoq, soorunami aamma eqqarsaallannarpoq qanoq iliussanersugut. Oqartoqartarpoq piitsuuneq ilungersunartuusoq, kisianni aamma oqartoqartarpoq pisuujuneq ajornartorsiutinik ulikkaartoq. Taamaattumik kaammattuutigisara unaavoq aningaasarpassuarnik nunatta isaatitsilinnginnerani eqqarsarluarsinnaanitta nalaani eqqarsaatigilereertariaqaripput qanoq ililluta nunatta siunissaa aaqqissuutissanerlugu Qallunaat Nunaanniit aningaasanik pisariaqartitsineq taamatippat, taavalu Qallunaat Nunaata Kalaallit Nunaatalu siunissami qanoq imminnut attuumassuteqarnissaat oqaluuserissallugu pingaartorujussuartut isumaqarfigaara, Lars-Emil Johansen oqarpoq.
