Lars-Emil: Nunatsinni naalakkersuisut qunusut

Lars-Emil Johansen taamannak sakkortutigisumik nunatsinni naalakkersuisut uparuarpai. Danmarkip naalagaaffiit peqatigiinnut nunarput pillugu eqqunngitsumik paasissutissiisarsimaneranik Namminersorneq pillugu Isumalioqatigiissitamut naalakkersuisut siulittaasuata Hans Enoksenip suliakkiiumannginnera Lars-Emil Johansenip tunniutiinnarnertut tunulliussinertullu isigaa.

Lars-Emil Johansen isumaqarpoq nunatsinni naalakkersuisut tamanna isummerfigalugulu iliuuseqarfigisariaqaraat, naalakkersuisut siulittaasuat oqaannarani statsministeri januaarimi naapikkuniuk eqqaalaarumaarlugu.

Lars-Emil Johansenip erseqqissarpaa kalaallit soqutigisaat naalakkersuisut illersortariaqaraat.

Danmarkip naalagaaffiit peqatigiinnut nunarput pillugu eqqunngitsumik paasissutissiisarsimaneranik paasissutissat suliareqqinnissaat kalaallit pingaartorsiutiginerusariaqaraat, Lars-Emil Johansen isumaqarpoq. Paasissutissat uppernarsaartillu taama erseqqitsigisut Danmarkimi nunatsinnilu naalakkersuisut kiisalu namminersorneq pillugu isumalioqatigiissitami oqaluuserineqartariaqarnerarpai.

Lars-Emil Johansen isumaqarpoq Hans Enoksen Danmarkimut maamaatsumik iliornaveersaartoq, isumaqarporlu mamaatsumik iliorneqarsimagaanni qulakkeerneqartariaqartoq ajortumik imaluunniit eqqummitsumik pineqaqqinnginnissaq.

Siumut februaarimi ataatsimeersualerpat Lars-Emil Johansen siulittaasutut qinigassanngortinniarnerluni oqaatigisinnaannginerarpaa.