Lars Emil: Nikku saaffiginnga taava oqaloqatigiissaagut
Taama akivoq Inatsisartut siulittaasuat, Lars Emil Johansen tusareerlugu Nikku Olsenip naammagittaalliutaa, tassaasoq partiip siunnersuutaasa 16-iusut akornanni sisamaannaat oqaluuserineqartussatut Inatsisartut siulittaasoqarfianit akuerineqareersullu.
Partii Inuit siunnersuutaasa 16-iusut akornanni taamaallaat sisamat Inatsisartut ukiaanerani ataatsimiinnissaanni akuerineqareersullu, Nikku Olsenip ippassaq ulloqeqqanut radioaviisimut oqaatigaa, Inatisartut suleriaasiat allanngortinneqartariaqartoq.
- Piffissaq qaninnerpaarluunniit atorlugu tamassuma aallanngortinneqarnissaa angorusupparput aamma tamanna qanoq iluuseqarfigereerlutigu. Tassami partiit ataasiakkaat akisussaaffigisussaanngilaat, Inatsisartut siulittaasoqarfiata suliassaanik naammassinninniarnissaq, tassami Inatsisartut allattoqarfiata suleriaasini nammineq akisussaaffigissavaa partiit ataasiakkaat akisussaaffiginagu, Nikku Olsen oqarpoq.
Nikku Olsenip taama sioorasaarineranut Inatsisartut siulittaasuat, Lars Emil Johansen ima oqaaseqarpoq.
- Soorunami piareersimavugut suleriaatsip pitsanngorsarnissaannut, aatsaalli tamanna pisariaqassappat. Kisianni suleriaaseq partiinut tamanut piumasaqaatigisarput unaavoq, oqaluuserisassat sukumiisumik tunngavilersorneqarsimassapput, sukumiisumik piareersarneqarsimassapput tassami oqaluuserisassanngortitsiniaannarluni oqaluuserisassanngortitsisarnissaq piumanagu. Aamma Siulittaasoqarfiup maannakkumut ingerlanneqarnera tusagassiutitigut ingerlanneqartussaanngilaq, tamanna Siulittaasoqarfimmi pisassaaq, Lars Emil Johansen taama oqarpoq.
Inatsisartuni oqaluuserisassatut siunnersuutit nassiunneqarneranni immikkut malittarisassaqarpoq imaattunik:
Inatsisartut inatsisissaattut siunnersuutit inatsisissatut ilusileriigaallutik aammalu nalinginnaasumik immikkullu nassuiaatinik, taamatullu aamma siunnersuutip aningaasatigut allaffissornikkullu kingunerisassaannik allaaserinninnermik, ilaqartinneqarlutik tunniunneqartassapput.
- Taamaattumik una oqaatigissavara, Inatsisartut torersumik sulisarnissaat aamma tunngavissaqarluartumik oqallittarnissaat, partiinut tamanut piumasaqaatigaarput, taamaattumik siunnersuutit oqaluuserisassat tunngavissaqarluarnissaat kissaatigisarlutigu. Siunnersuutilli maanna itigartinneqartut kingusinnerusukkut nassiuteqqinneqarsinnaapput iluarsaatereerserisa kingorna.
Lars Emil Johansenip ilanngullugu oqaatigaa, siunnersuuteqarnermi malittarisassanik nalornisoqartillugu Inatsisartut allattoqarfiat piareersimammat ikuunnissaminut ima nangilluni Lars Emil Johansen oqarpoq.
- Partiit tamarmik Inatsisartunit aningaasatigut tapiiffigineqartarput, aningaasallu taakku sulisoqarnissaminnut atugassaraat. Sulisullu taakku qularnaveeqqutaasussaapput tunngavilersorluakkanik aamma torersumik oqaluuserisassat suliarineqarnissaannut.
Inatsisartut siulittaasuat, Lars Emil Johansen taama oqarpoq.
