Lars Emil: Nikku Olsenip mattussaanera oqaaseqarfigerusunngilara

Qinersineq naammassineqariartorlu Qinigaanerup Misilinneqarnissaanut Ataatsimiititaliaagallartussamik pilersitsisoqartarpoq. Tassanilu ilaasortaasarput utoqqaanersartaasoq qinikkallu allat sisamat. Ataatsimiititaliami matumani ilaasortaasut tassaapput Partii Inuit siuttuat Nikku Olsen, Siverth K. Heilmann, Kuupik Kleist, Jens B. Frederiksen kiisalu utoqqaanersartaasoq Lars Emil Johansen.

-Allatulli suliassaavoq, immaqali nuannernerpaajunngitsoq. Tamat oqartussaaqataarnerisa ingerlanneqarnerani suliassaavoq pisariaqartoq, tassalu ilaasortat qinigaasinneraanerisa misilinneqarnissaaat. Taamaammat suliassama ilaatut pingaarutilittut aamma suliaraara, Lars Emil Johansen KNR-imut oqarpoq.

Nikku Olsenip inatsisartuni sulinissaminut mattunneqarnera pillugu aperineqarami, Lars Emil Johansenip politikkikkut misilittagartuujunini ersersippaa tigussaanerusumillu nassuiaateqarluni.

-Pineqartumut tunngatillugu immikkuualuttunut soorunami oqaaseqarsinnaanngilanga, Inatsisartulli suliami matumani pineqaatissiissutaasimasoq ullorlu pineqaatissiiffiusoq naliliiffigaat, tamannalu tunnagvigalugu piffissami maannakkorpiaq Inatsisartunut ilaasortaasinnaangitsutut aalajangiiffigalugu, Lars Emil Johansen nassuiaavoq.