Lars-Emil: Nalorninartorujussuusoq nalunngikkaluarpaat
Puisit neqaannit pølsiliat aallartikkaluarnerat Puisi A/S-imi siulersuisunut ilaasortat assut isornartorsiorpaat, tunisassiornerulli ingerlaqqinnissaa Namminersornerullutik Oqartussat taamani kissaatigisimavaat, taamanikkut suliffissaaleqisoqarnerujussua pingaartumik eqqarsaatigalugu.
Puisi A/S-imi siulersuisuni siulittaasuusimasoq, Lars-Emil Johansen, puisip neqaanik pølsiliat pillugit annertuumik mamianartuliaq pillugu ulloqeqqata siorna nassuiaagami taama oqarpoq.
Lars-Emil Johansenip nassuiaanermini erseqqissartuarpaa, qanoq-iliuusissat tamaasa siulersuisunut ilaasortat sapinngisamik aalajangertarsimagaat, suliarlu isornartoqartissimagaat.
Puisi A/S pillugu Namminersornerullutik Oqartussat qularnaveeqqutaat, eqqartuussivimmi maanna sammineqartoq, Lars-Emil Johansenip nassuiaanermini aallaqqaammut assut sammivaa.
Lars-Emil Johansen nassuiaavoq, taamatut qularnaveeqqusiiniarneq siulersuisunut ilaasortat tunuarsimaarfigisimagaat. Erseqqissaatigaalu piginneqataasut annersaat, tassalu Namminersornerullutik Oqartussat, qularnaveeqqusiisimanngikkaluarpata, akilersuinermik unitsitsinissaq siulersuisut siunnersuutigisimassagaluaraat.
- Atorsinnaannginnerarlugu imaaliallaannaq oqartoqarsinnaanngilaq. Misigisimanarpormi piniarnermik inuussutissarsiutilinnut pingaaruteqartuusoq, Kujataanilu suliffissaqartitsinermut iluaqutaassaqaluni, Lars-Emil Johansen Nunatta Eqqartuussiviani ulloqeqqata siorna oqarpoq.
Annertuumik nalorniartorsiortoqartoq Namminersornerullutik Oqartussat nalunngilluinnarsimagaat Lars-Emil Johansenip nangaajallanngivilluni oqaatigaa.
- Tamanna erseqqilluinnartumik atuarneqarsinnaavoq. Qularnaveeqqusiineq nalorninaannarani NALORNINARTORUJUSSUUSOQ Namminersornerullutik Oqartussat nalunngikkaluarpaat, Lars-Emil Johansen oqarpoq.
Puisi A/S pillugu eqqartuussisutigut suliaq ualeru nangeqqissaaq.