Lars-Emil: Naalakkersuisut siulersorneqarsimanngillat

- Naalakkersuisut siulittaasuat Aleqa Hammond Naalakkersuisunik siulersuinerminik naammaginartumik ingerlatsisimanngilaq, ukiorpassuarni Naalakkersuinermik suliaqartoq, piffissamilu kingullermi Inatsisartuni Siulittaasuusoq, Lars-Emil Johansen oqarpoq.

Paatsiveerunneq puullaaqinerlu angeqaaq Kalallit Nunaat torersup tungaanut ingerlanngilaq.

Naalakkersuisunut ilaasortat torinngiinnarmik aallaqattaartut, Naalakkersuisunut ilaasortat tunuartut Nick Nielsen, Jens Erik Kirkegaard, Steen Lynge Siverth K. Heilmannilu eqqarsaatigalugit, Lars-Emil Johansen oqarpoq.

Naalakkersuisut Siulittaasuata Naalakkersuisunik siulersuisimanera isornartoqartinneqarpoq.

- Naalakkersuisut siulittaasuat naalakkersuisunik siulersuinissaa pisariaqarpoq, massakkut pisumi takuneqarsinnaavoq, naalakkersuisunik siulersuineq naammaginartumik ingerlasimanngitsoq.

Naalakkersuisunut ilaasortat akisussaaffimminnik  tigumminninnerat annikissimasoq  Lars-Emil Johansen isumaqarpoq.

- Soorlumi Naalakkersuisunut ilaasortat akisussaaffiup qanoq  pingaartiginera paasisimanagu inissisimasimasut, inuiaqatigiit ingerlarngannut akisussaanertik aamma inuiaqatigiit avataanit isigineqarnerannut tassungalu ilanngullugu inuiaqatigiit avataanit aningaasaliiffigineqarusunnerannut, ukiuni makkunani pisariaqaleruttortumut nunatta isigineqarnera akornuserneqartigisoq, soorlu maluginagu iliuutsitik iliuuserisaqattaaraat, Lars-Emil Johansen oqarpoq.

Lars-Emil Johansen Kalaallit Nunaanni naalakkersuinikkut sulinerup ajunngitsumik ingerlalernissaanut kissaateqarpoq.

- Kalaallit Nunaanni Naalakkersuinikkut inissisimaffipput torinngeqaaq, taamaattumik silaannaq torersumik immersorneqassappat, nutaamik ingerlaaseqartariaqarpugut, suleqatigiinneq akisussaaqatigiinnerlu anginerusariaqarput, agguaasseqatigiinneq  illuatungiliuttaqattaarneq piunnaarlugu, suleqatigiinneq akisussaaqatigiinnerlu annerusumik ingerlanneqartariaqarput, Lars-Emil Johansen taama oqarpoq.