Lars-Emil KNAPK-mut paasinnippoq

Sinerissamut qanittumi raajarniartut ukioq manna pisassatik nungulluinnalermatigit KNAPK Naalakkersuisunut saaffiginnipppoq. Ukiortaallu tungaanut suli qaammatit pingajuata affaa ingerlaqqaassaaq. Sinerissap qanittuani raajarniarpassuit unikkallartariaqarnerannik tamanna kinguneqarsinnaavoq.
oktobarip 14-at 2008 17:10

- Tamanna isumakulunnaqaaq, taamaammallu avataasiorlutik raajarniartut pisassaasa ilaannik sinerisami raajarniartunut Naalakkersuisut nuussisariaqarput, KNAPK taama allappoq.

Siumup politikikkut oqaaseqartartuata, Lars-Emil Johansen-ip ajornartorsiut paasilluarpaa, oqarlunili inatsimmik allannguisoqartariaqartoq.

Lars-Emil Johansen ima oqarpoq:

- Soorunami taanna saneqqunniassagaanni nutaamik inatsisiliornissaq pisariaqassaaq, imaluunniit inatsit maannakku atuuttoq inassuteqartittariaqassaaq § 19 stk. 5 atorunnaarsillugu. Imaluunniit nutaamik immikkoortoq 6-ilerlugu § 19 imatut oqaasertalimmik; Nunami suliffissuarni suliffissaqartitsinissaq qulakkeerniarlugu naalakkersuisut immikkut akuersissuteqarnissaminnut piginnaatinneqarput. Avataasiortut raajartassaasa ilaannik sinerissat qanittuani raajarniartunut nuussisinnaanissaminnut, Lars-Emil Johansen oqarpoq.

- Pissutsit taamaaleriaataarsinnaanerat, taavalu inatsisip taamannak kipparitsiginera ersiutaanngila inatsisiliornerluttoqarsimaneranik?

-Taama oqartoqarsinnaavoq, immikkut akuersissutiliisimannginnerput sanngeequtaasorujussuuvoq kisianni siunertaq unaasimavoq taamanikkut illuatungeriit pingaartilluinnarmassuk aalisarnermik inatsisip maannakkut atuuttup suliarinerata nalaani pisassiissut kvote aveqqissaagaq sinerissap qanittuani aalisartut 43 % pissagaat avataasiortullu 57 % pissagaat taakkua imminnut akulerutsinneqassanngilluinnartut. Kisianni maannakkutut pisoqartillugu immikkut akuersissuteqarsinnaaneq isumaqarpunga saneqqunneqarsinnaanngitsoq, Lars-Emil Johansen oqarpoq.

Radio aviisimiit aperineqarpoq tamatuma inatsisartuni suliarineqarnissaata qaquguunissaa takorloorneqarsinnaanersoq.

- Inatsisartut ataatsimiinnerat una sapaatip akunnera naappat unikkallartussaavoq. Unikkallarnerullu nalaanni Namminersorneq pillugu paasititsiniaanerma nalaani inatsit taanna piareersarneqarsinnaavoq, siulittaasoqarfimmilu akuerineqarsinnaaguni, oqarpoq.

Taanna erseqqissaavoq aalisarnermik inatsisip nutarternera utaqqiinnarneqarsinnaanngitsoq. Taassuma aamma naalakkersuisut siunnersuuteqarnissaannik kajumissaateqarsinnaanerat erseqqissaatigaa.