Qinersinerup inerneri tunngavigalugit Siumup siulittaasuanut naalakkersuisuugallartullu siulittaasorigallagaannut Hans Enoksenimut ajorsarnini Lars-Emil Johansenip nassuerutigaa. Taamaalilluni siulittaasumut piukkoornerigaluani tunuartillugu Hans Enoksenimik tamakkiisumik tapersersuilluni Lars-Emil Johansen oqarpoq.
- Siumup nuna tamakkerlugu ataatsimeersuarnerani siulittaasutut qinigaasimasoq Hans Enoksen assortorneqarsinnaanngitsumik partiimi siulittaasuuvoq, maannakkullu qinersinerup erseqqissisippaa, Hans Enoksen naalakkersuisut siulittaasussaattut Siumup qinigassanngortitarigaa tapersersorteqarluartorlu. Lars-Emil Johansen taama oqarpoq.
Lars-Emil Johansen qinigaarujussuartutut imminut taasinnaanani oqarpoq, kusanartumilli angusaqarsimanerarluni.
- Partii qinersinerup kingorna maanna ataatsimoortoq Inatsisartuni suleqataaffigissallugu qilanaaraara. Erseqqissaavoq.
Lars-Emil Johansenip Hans Enoksen partiimi siuttuuneranik uparuartarsimavaa, piukkunnassusaalu apeqqusertarsimallugu, massakkummi ?
- Siumumi isummat assigiinngitsut oqimaalutartuartarpugut taamaaliortuassallutalu. Aamma Hans Enoksen pikkoriffeqarlunilu pikkorluffeqarpoq, taamaattumik taakkunatigut immitsinnut ikorfartoqatigiissinnaanissarput isumaqarpunga maanna periarfissaqarlualersoq. Lars-Emil Johansen nassuiaavoq.
Naalakkersuisunngortitsinissaq siunertaralugu partiit akornanni oqaloqatigiinnerit ingerlanneqaleruttorput, Inatsisartullu gruppeanni ilaasortatut oqaloqatigiinnermi oqaloqataanissani naatsorsuutigaa, annerusumilli oqaaseqarsinnaanngikkallarnerarluni. Siumut naalakkersuisunngortitseqataassanngikkaluarpat taava?
- Demokratii najoqqutaralugu oqalunnermi qinersisartut oqariartuutaat erseqqippoq, Siumup tapersersorneqarluarluni inissinnera isumaqarpunga periarfissanik ammaassinissaa ilimanarnerusoq, Siumup saneqqullugu iliuuseqarnissaminngarnit. Lars-Emil Johansen naliliivoq.