Lars-Emil Johansenip piumasami ilaa pivaa

Namminersorneq pillugu isumalioqatigiissitat Skjoldnæsholm-imi sisamassaanik ippassaq ataatsimiipput. Atugagdliutini ullumi saqqummertuni allaaserineqarpoq, Folketingimi ilaasortap Siumumeersup Lars-Emil Johansenip inatsisit tunngaviusut inuiaallu tamat inatsisaat pillugit apeqqutini inatsisilerituut danskit marluk siunnersortissatut toqqarneqarsimanerat naammagittaalliutigisimagaa, tamannarpiarlu kalaallit ilasortaatitaasa akornanni ulapputigineqarsimaqisoq.

Lars-Emil Johansen naalakkersuisut siulittaasuannut Hans Enoksenimut sapaatip-akunnerani kingullermi allakkatigut naammagittaalliorpoq, inatsisilerituunillu nammineq toqqaajumalluni. Lars-Emil Johansen piumasani pinngikkuniuk ataatsimiititaliap siulittaasuatut tunuarniarluni arfininngormat siorasaarisimavoq, ippassarlu oqallinnermi isumaqatigiissutigineqarpoq, inatsisilerituut aappaa Lars-Emil Johansenip toqqarsinnaassagaa.

Namminersorneq pillugu inatsisissami kalaallit danskillu oqaasiisa inissisimanissaat kiisalu nunanut allanut sillimaniarnermullu tunngasut ataatsimiititaliamit aamma oqaluuserineqarpoq, nunanut allanut tunngasut ataatsimiinnissami tullerni septemberip arfineq-pingajuanni oqaluuserineqaqqissapput.