Lars-Emil Johansenip Kuupik Kleistillu oqaaseqaatiginiagaat
Folketingimi naggataarutaasumik oqallinnermi naalagaaffeqatigiinnerup ineriartornera ilaasortaatitatta aappaata, Siumumeersup, Lars-Emil Johansenip tikittussaavaa. Naalagaaffeqatigiinnermi Kalaallit Nunaata siunissaa pillugu danskit politikeriisa tukermersortarnerujussuat annikinnerulersimasoq, Lars-Emil Johansen isumaqarpoq.
Taamaakkaluartorli Kalaallit Nunaanni kiffaanngissuseqarnerulernissamik suliap annertusarneqarnissaa pillugu politikerit kissaataat atorfillit paasisimagunanngikkaat Lars-Emil Johansenip tikkuarniarpaa.
Puisit amii pillugit oqallinnerup, pingaartumik danskit tusagassiorfiini tamatuma oqallissutaanera, IA sinnerlugu Folketingimi ilaasortap, Kuupik Kleistip, oqalugiarnermini ilaatigut tikissavaa.
Puisit amiinik Canadameersunik kingumut pisisalernissaq pillugu Naalakkersuisut aalajangernerannut atatillugu Inatsisinik atortitsinermut ministerip, Lene Espersenip, tamanut ammasumik isornartorsiunera kukkunerusoq Kuupik Kleist isumaqarpoq.
Uumasunik illersueriaaseq naalagaaffeqatigiinnerup avannarpasissortaani kujasissortaanilu tunngaviusumik assigiinngitsumik isumaqarfigineqassasoq, Kuupik Kleist isumaqarpoq.
