Lars-Emil Johansen: Tulluannginneraaneq ilumuunngilaq
Danmarkip Radioatigut konservativit Kalaallit Nunaat pillugu oqaaseqartartuat, Per Ørum Jørgensen oqalliseqatigalugu Lars-Emil Johansen oqarpoq, nunarsuatsinni ukiorpassuarni mingutsitsisut pisuullutik silap pissusaata allanngoriartornera pissutigalugu Kalaallit Nunaanni ineriartortitsineq killilerneqassappat tamanna kusananngitsoq. Aatsaammi Kalaallit Nunaanni tunisassiorneq ingerlanneqarlualerpat mingutsitsinngitsunik nukissiulissaqqaaratta, soorlu erngup nukinga atorlugu nukissiornikkut. Tamannali angutinnagu Kalaallit Nunaanni mingutsitsineq, nunanut allanut sanilliullugu taama annikitsigereersoq, assigiinngitsutigut tunisassiorsinaalernissat piareersarneranni mingutsitsinerup ukiuni tulliuttuni annertusiallakkallarnissaa nunat allat akuerisariaqaraat, Lars-Emil Johansen oqarpoq.
Konservativilli Kalaallit Nunaat pillugu oqaaseqartartuat, Per Ørum Jørgensen oqarpoq, silap pissusaata allanngoriartornera pillugu ataatsimeersuarnissami Kalaallit Nunaat sammineqassaqimmat, tamanna Kalaallit Nunaata eqqiluitsutut orniginartutullu nittarsaannissaata pingaarutaa eqqaamallugu saqqummiisoqartariaqartoq. Taamaaliornikkummi nunanit allanit suliffeqarfinnut aningaasaleeqataarusuttut takornariarusuttullu Kalaallit Nunaat soqutiginarsarneqarsinnaammat.
Lars-Emil Johansenili oqarpoq Kalaallit Nunaanni mingutsitsinngitsumik nukissiorsinnaalernissaq tikillugu, Kalaallit Nunaata ineriartortitsinermini mingutsitsinerminik annertusigallartitsiniarluni nunat qangali mingutsitsiuartut mingutsitsinerminnik annikillisitsinerat akiliiffigisalissappagu, tamanna naapertuuttuusinnaanngitsoq. Nunammi qangali annertusiartuinnartumik mingutsitsiuartut, taakkuusariaqarput akisussaaffimminnik nassuerutiginnillutik, qanoq ilillutik mingutsitsinerminnik annikilliliinissaminnik nassaartortariaqartut. Imaanngitsoq siornatigut nunat annikitsuaqqamik mingutsitsillutik ineriartorsimasut aningaasatigut imminnut ingerlassinnaalernissartik anguniarlugu ineriartorniartut akimmisaartinneqassasut, Lars-Emil Johansen oqarpoq.
Per Ørum Jørgensen oqarpoq, Kalaallit Nunaat nunatut allatut ineriartortutut silap pissusaata allanngoriartorneranik eqqorneqarnerlututut taaneqarsinnaanngitsoq. Naalagaaffiup iluani, tassa Danmarki, Savalimmiut Kalaallit Nunaallu peqatigiillutik sukkut ineriartortitsinissat aallaavigalugit isumasioqatigiinnikkut aaqqiissutissanik nassaarniaqatigiikkumaarput, konservativit silap pissusaa Kalaallit Nunaallu pillugit oqaaseqartartuat, Per Ørum Jørgensen oqarpoq.
