Lars-Emil Johansen: Søren Espersen eqqortippoq!

Dansk Folkepartiimeersup Søren Espersenip Lars-Emil Johansen avoqqaaraa, Lars-Emil Johansenip namminersorneq pillugu isumalioqatigiissitat sulinerat ajoquseraa. Taassuma taama avoqqaarinninnera Lars-Emil Johansenip qungujuutigalugulusooq ima akiinnarpaa.

- Isummanik saqqummiussuineq naqisimaneqanngitsoq sulinermut sumulluunniit akornutaaneq ajorpoq, aamma kommissionimi sulinermut akornutaanngilaq. Aamma Søren Esperseni kommissionimut tassunga siuttuunngilaq, taamaattumik aamma kommissioni sinnerlugu taamatut oqalussinnaanani, Lars-Emil Johansen oqarpoq, qalleqqissaavorlu:

- Avannaamiutoqaagama nalunngilara qimussertartut oqartartut, qimmeq eqqortittoq kisimi maartarpoq, taamaattumik tupinnanngilaq Søren Espersen oqaatsinik ukunani eqqortissimaguni, oqarpoq.

Lars-Emil Johansen aperaarput Søren Espersenip isornartorsiorsimagaa Lars-Emili oqallorissaarnerarlugu, tamannalu qanoq akisinnaaneraa.

- Soorunami oqallorlunniarsarinavianngilanga, isummat erseqqissumik annissukkakka uanga nammineq eqqarsartaatsinninngaanneersuupput, Kalaallit Nunaat sinnerlugu folketing-imi ilaasortaaninni pisariaqartutut isumaqarfigisakka. Eqqarsartaatsikkut iliuutsikkut kulturikkullu naqisimaneqarneq eqqartorpara timikkut naqisimaneqarneq eqqartunngilara, taannalu Dansk folkepartiip minnerpaannguamilluunniit uagutsinnut ajoqersuussutiginiarsinnaanngilaat.

Aperaarput: Tassa imaappa Søren Esperseni nunasiaateqarpalaartumik isumalioriaaseqartoq?

- Taanna isertuussinnaanavianngilluinnarpaat, imatullu ittangatigisumik oqariartuuteqarpata, naalanngikkussi taava namminersulivinnavianngilasi, taava oqartariaqarpugut ilissi taanna aalajangigassarinngilarsi! Namminersorneq uagut tunissutisiassarinavianngilarput uagununa nammineq pilersitassarput! Folketingimi ilaasortaq Lars-Emil Johansen taama oqarpoq.