Lars-Emil Johansen siunnersortissamisut kalaaleq toqqarpaa

Lars-Emil Johansenip 31-inik ukiulik universitetimi ilisimatusarsimasoq Mininnguaq Kleist Namminersorneq pillugu isumasioqatigiissitami naalagaaffiup iluani inuillu pisinnaatitaaffiinik suliaqarnermini siunnersortissamisut toqqarpaa.

Taamaalilluni Lars-Emil Johansenip inatsisilerituunik danskinik marlunnik isumasioqatigiissitami toqqaanermut akerliliinera iluarsiiffigineqarpoq.

Lars-Emil Johansenip inatsisilerituut taakkua marluk toqqarneqarnerat Naalakkersuisut siulittaasuannut Hans Enoksenimut ammasumik allagaqarluni akerliliiffigaa sapaatillu akunnerata naanerani kingullermi isumasioqatigiissitami siulittaasutut tunuarniuteqarnissaminik siorasaaraluni.

Tamatuma kingorna Namminersorneq pillugu isumasioqatigiissitami ilaasortat kalaallit siunnersuuteqarput Lars-Emil Johansenip nammineerluni kalaallimik siunnersortissaminik toqqaasinnaaneranik. Ullumikkullu Mininnguaq Kleist isumasioqatigiissitami siunnersortitut toqqarpaa.

Mininnguaq Kleistip Nunat avannarliit killiit Nunatsinni inuit pisinnaatitaaffii pillugit nalunaarusiaq saqqummersippaa. Taassuma sanitigut nunami sumiluunniit ilisimatusarneq naalakkersueriaatsillu nunap tunngaviusumik inatsisai ilinniarnermut atatillugu suliarisarsimavai, taamatut Lars-Emil Johansen oqarpoq. Ilanngullugu Mininnguaq Kleist tassaasoq kalaallit ilinniagaqarluarsimasut ilagigaat.

- Nunatsinni kinguaariit tulliisa isumaat tusassallugit piffissanngorpoq, Lars-Emil Johansen oqarpoq.

Lars- Emil Johansenip aamma ullumi erseqqissarpaa Folketingip naggataarnersiorluni ataatsimiinnerani Nunani Avannarlerni Killerni sinniisutut oqalugiarpoq.

Tamanna aqagu ullup qeqqanut radioaviisimi itinerusumik tusarfigeqqikkumaarparput.