Lars-Emil Johansen: Siumumi ikiaroornartumik ajornartorsiortoqanngilaq

Katuami kalaallisut qineqqusaartoqarnerani ippassaq Lars-Emil Johansen Hans Enoksen-ilu assammeriarlutik eqerujussuarmata taama inuit nilliarallutillu ersaartaaterujussuarpaat.

Qineqqusaarnermi taanna maluginiarneqarnerpaat ilagaat, aammali Lars-Emil Johansen-ip oqarnera siumumi siuttut akornanni ikiaroornartumik ajornartorsiuteqartoqannginneranik oqarnera aamma maluginiarneqarluni.

Lars-Emil Johansen nassuiaatipparput, siullermillu eqinnerat qanoq paasineqassanersoq aperigatsinni ima oqarpoq:

-Hans Enoksen-ilu isumaqatigiinngissuteqarpugut, minnerunngitsumik partiitta siulersorneqarnerani, siulersorneqarneranilu periaatsinik. Kisianni partiitsinni ataatsimoorpugut. Inuttagut pingaarnerunngillat parteerpulli, partiittalu politikkia pingaarnerusut tassani takutinniarparput, Lars-Emil Johansen oqarpoq.

Lars-Emil Johansen-ip ilanngullugu oqaatigaa eqinnertik takussutissaanngitsoq naalakkersuisut siulittaasunngornissani unitsiinnarsimallugu.

-Qinersinermi inuttut qinigaarujussuassagaluaruma siulittaasussarsiornermi oqaloqataanissannut akuunissami tunuarsimalersaanngilanga.

Lars-Emil Johansen qineqqusaarnerup nalaani aamma oqarpoq, Siumut partiiusoq siuttoqarnikkut ikiaroornartumik ajornartorsiuteqanngitsoq, Siumut partiiusoq erseqqilluinnartumik ikiaroornartumut akiuiniartoq. Lars-Emil Johansen-ip tamanna nassuiaatigaa oqarluni, qineqqusaarnerup ingerlanerani politikerit naalakkersuisut akornanni ikiaroortoqartarneraaneq arlaleriarluni tutsiuttarsimasoq, silaannarmilu tamakku erfattut akuerisinnaannginnamikkit taamatut nalunaaruteqarluni.