Lars Emil Johansen politikkimut uteqqippoq
Lars Emil Johansen 62-inik ukioqartoq qinigaaffinni marlunni Siumut sinnerlugu Folketingimut ilaasortaasimavoq. Siullermik 1973-imit 1979-imut aappassaanilu 2001-imit 2011-mut. Lars Emil Johansen Inatsisartuni 1979-imit 1997-imut ilaasortaavoq, aamma 1979-imit 1986-imut aatsitassanut naalakkersuisuuvoq. Lars Emil Johansen piffissami 1991-imit 1997-imut naalakkersuisunut siulittaasuuvoq. Lars Emil Johansen aamma Siumumi 1987-imit 1997-imut siulittaasuuvoq.
Nunatsinni politikerit misilittagaqarnerpaat ilaat taamaalilluni politikkimut uteqqittussanngorpoq.
-Parteera sinnerlugu qinigassanngorteqquneqarpunga, peqqikkamalu nukissaqarlungalu, sooq naaggaassanerlunga takusinnaasimanngilara. Kalaallit Nunaat nunap oqaluttuarisaanerani pingaaruteqarnerpaamut ingerlaarpoq, tamatumanilu misilittakkakka atorlugit nunarput siunissamut pitsaanerusumut ingerlanneqarnissaani ikiuukkusuppunga, Lars Emil Johansen knr.gl nassuiaavoq.
