Folketingimi ilaasortat piumagunik isertitatik suliatillu pillugit nalunaarutiginnissinnaatitaanerat oqallisigineqaqqilerpoq.
Nunatta ilaasortaatitaasa aappaat Lars-Emil Johansen, Siumumeersoq nalunaarutiginninniarani nalunaarpoq.
Lars-Emil Johansenip nalunaarutiginninniarani nalunaarnera Nuummi parteeqataanit paasineqarluni ilalernartinneqarpoq, soorlu partiip Siumup Nuummi immikkoortortaata allattaa Marianne Jensen taama isumaqartoq:
- Isumaqarpunga tupinnarpallaanngitsoq eqqarsartitsissappat soormitaava amerlanerit akuersaartut, ikittunnguit taakku akuersaanngillat, kisianni inuit ataasiakkaat namminneerlutik tamanna nassuiartariaqassavaat, Marianne Jensen oqarpoq.
Folketingimi ilaasortat 139-t nalunaarutiginninniarlutik nalunaarsimapput, ilaallu 40-t nalunaarutiginniniaratik.
Nunatta ilaasortaatitaasa aappaat Inuit Ataqatigiinneersoq Kuupik Kleist isertitamik nalunaarutiginnereersimanerarpoq.
Lars-Emil Johansen radioaviisimut oqarpoq isertuussaqartariaqarani, Folketingimullu ilaasortatut paasissutissat pisariaqartut tunniutereersimallugit.
Nuummi Siumut immikkoortortaani siulittaasumut tullersorti Ole Berthelsen isumaqarpoq Lars-Emil Johansenip aalajangernera ataqqisariaqartoq:
- Lars-Emil Johansenip taamatut aalajangernera inuttut nammineq aalajangigarimmagu ataqqisariaqarpoq, Ole Berthelsen oqarpoq.