Lars-Emil Johansen OL pillugu ataatsimeeqatiserineqarpoq

Danmarkimi kultureqarnermut ministerip Brian Mikkelsen-ip nunarput sinnerlugu Folketingimi ilaasortap aappaa Lars-Emil Johansen januaarip 23-ianni ataatsimeeqatiseraa, aviisimi Politiken-imi ullumi taama aallaasaqartoqarpoq.

Kalaalllit timersortartut nunat tamalaat OL-imut peqataanissamut piumasaqaataannik naammassinnereeraluarlutik Danmarkimi timersortartut Kattuffiata piumasaqaataanik aamma peqqaartariaqartartussaanerat pillugu, Lars-Emil Johansen-ip isornartorsiutaa pillugu ministeri oqaloqatiginnikkumavoq.

Danmarkimi timersoqatigiit kattuffiata piumasaqaatai naapertorlugit Kalaallit akuerineqaqqaartussaanerat pissutigalugu Martin Møller OL-imut peqataasinnaajunnaarpoq, naak OL-imut peqataanissaminut nunat tamalaat piumasaqaataannik naammassinnittutut nalilerneqaraluarluni.

Tamanna pillugu nunatta tungaaniit politikkikkut tatisimannittoqaraluartorluunniit DIF-ip Martin Møller Ol-imut peqataatinnianngilaa.

DIF-ip siulittaasua Kai Holm isumaqarpoq, kalaallit kingusinaarlutik immikkut pineqarnissamik qinnuteqarsimasut.

Nunatsinni timersortartut kattuffiata Martin Møllerip OL-imut Italiami qaammatip tulliani ingerlanneqartussamut peqataanissaanik qinnuteqaataa siulleq 2002-mi upernaakkut DIF-imut tunniunneqartoq taamani aamma akuerineqanngilaq.