Lars-Emil Johansen: Nunaqarfimmiut ataatsimeersuaannguatsiaannarput

Siumup ataatsimeersuarnerani nunaqarfimmiut 40-pput, illoqarfimmiut 15-ullutik, sinnerilu inatsisartuni, Siumullu siulersuisuunerni ilaasortaallutik. Ataatsimeersuarnermi ilaasortaqqortussuseq najoqqutarinagu aallartitalersorsimaneq tulluarsorineqanngilaq, tamanna equnganermik pilersitsivoq, Siumut demokratiimik amigartoorpoq, Siumup ataatsimeersuarnerinagu nunaqarfimmiut ataatsimeersuarneraat. Tamakkuupput oqaatsit pinngortut, Siumup Sisimiuni ataatsimeersuarnerata kingorna. Siumumi aallartitseqataasimasup, Folketingimullu qinigaarlaap Lars-Emil Johansenip pakatsisimanini isertuutinngilaa, ilaatigullu oqarpoq tupigissanngikkini illoqarfimmiut sinniisoqanngitsutut misigisimassappata, Lars-Emil Johansenip nuannaarutiginnginnerarpaa Folketingimi qinerneqarluareerluni Siumup qullersaqarfiani angusarissaarpallaannginnami, imalu nangippoq:

- Sajuppillatsinneqartutut misigisimavunga, Siumumi pilersitseqataasutut siumutoqqatullu, allaat eqqarsarpunga Siumumi inissaqangitsutut.

Lars-Emil Johansen isumaqarpoq Siumup ataatsimeersuarnera nunaqarfimmiut ataatsimeersuarnerattut oqaatigineqarsinnaasoq.

Nunaqarfimmiut nunatsinni amerlanerussuteqanngimmata, ataatsimeersuarnermi demokratii amigartoortoq oqaatigisariaqarnerarpaa.

Lars-Emil Johansenilli nuannaarutiginerarpaa, Siumup tullianik ataatsimeersualerpat ilaasortaqqortussuseq najoqqutaralugu aallartitaqartussanngormat.