Lars-Emil Johansen: -Namminersorneq Namminiilivinnissamut alloriarneruvoq

Namminersorneq pillugu paasissutissiinerit annertuut siullersaat tassuugunnguaq nalunaaqutaq qulingiluanut Nuummi kulturikkut illorsuarmi Katuami pissaaq, namminersornerlu inuiattut ullorsiornitsinni, aappaagu juunip 21-anni, atuutilissalluni. Taamatuttaaq innuttaasunik novembarimi taasititsisoqartussaavoq.

Isumalioqatigiissitap ilaasortai arlallit ullumikkut saqqummiussissapput, tusarnaariallu apeqquteqarnissaminnut oqalliseqataanissaminnullu periarfissaqassallutik.

Lars-Emil Johansen, Siumumeersoq, Kalaallit Nunaata namminersulersinnaanera pillugu saqqummiussissaaq.

Lars-Emil Johansen aperaarput Namminersorneq ima paasisassaanersoq Namminiilivinnissamut alloriarnerussasoq siulleq.

- Isumaqarpunga nunatsinni ineriartorneq namminiilivinnissap tungaanut ingerlasoq, Lars-Emil Johansen oqarpoq. Taanna aamma erseqqissaavoq Namminersornerulernerup eqqunneqaqqaarneraniilli tamanna siunertarineqartoq.

- Alloriarneq tulleq tikitassarput tassa Namminersorneq, taannalu akuersissutigineqassappat uagut kalaallit inuiattut siullerpaamik akuerineqassaagut. Taamaaligutta inuiassut silarsuarmiittut allat assigalugit kiffaanngissuseqartitaanissamik aalajangersinnaatitaalissaagut, piumaguttalu taanna qaquguluunniit atorsinnaassavarput, taamaattumik Namminersorneq Namminiilivinnissap tungaanut aqqutaavoq, Taama oqarpoq Lars-Emil Johansen.

Taassuma aamma erseqqissaatigaa kalaallit oqaasii pisortatigoortumik inissisimalissasut.

- Tassalu imaappoq allaffissornikkut taakku aamma atorneqartussanngussapput, Lars-Emil Johansen oqarpoq.