Naalakkersuisuni imaluunniit Folketingimi ilaasortaanissaq qineqquneqarmat – Folketingimi ilaasortaaginnarnissaq Lars-Emil Johansenip qinerpaa.
Qinigaasinnaanerup Misilinneqarnissaanut Inatsisartut Ataatsimiititaliaata ippassaq aalajangerpaa, Lars-Emil Johansen marlunnik ilaasortaaffeqarsinnaanngitsoq.
Naalakkersuisunillu tassa maanna tunuarpoq.
Pingaarnertut inuttaasoq aperaarput Naalakkersuisunit sooq tunuarnersoq:
- Tunngaviusumik isummat pissutigalugit imaaliinnarlugit akuersaaruminaatsissimavaat folketingimi ilaasortatut ingerlaqqinnissara kommissionip naammassinissaata tungaanut, Lars-Emil Johansen oqarpoq, nangillunilu:
- Uanga kissaatigisimagaluarpara folketingi ullumiminngaanniit aasaanerani sulinngiffeqalertussaammat aasaaneranilu kommissionip suliani naammassisussaammagit naalakkersuisunut ilaasortaaninnut akornutaanngitsumik taakku naammassisinnaassallugit, kisianni soorunami ataatsimiititaliap aalajangernera tusaatissatut tigullugu qinerlertariaqarsimavunga, kommissionimilu suliaq pingaartikkakku naalakkersuisutut tunuarpunga, Lars-Emil Johansen oqarpoq.
