Lars-Emil Johansen: KNR Radio kalaallisuinnaq ingerlanneqartariaqarpoq

Partiip Siumup Nuummi immikkoortortaata siulittaasua, Lars-Emil Johansen, isumaqarpoq,

KNR Radio kalaallisuinnaq ingerlanneqartariaqartoq.

Nunatsinni innuttaasut kalaallisuinnaq oqaasillit radiokkut kalaallisut tusagassaqartinneqartarnerat annikippallaartoq ilaatigut tunngavilersuutiginiarneqarpoq.

Kalaallit danskisut oqalussinnaasut, danskillu kalaallisut oqalussinnaanngitsut, internetikkut Danmarks Radiokkullu tusagassaqarnissaminnik periarfissagissaaqimmata, KNR-imi kalaallisuinnaq aallakaatitsisoqartariaqartoq, Lars-Emil Johansen oqarpoq.

Nunarsuarmioqatigiinnerulli aqqani oqaatsimik allamik tusagaqalaarneq ajornalissava? Lars-Emil Johansen ima akivoq:

- Taamaaqqajanngilaq. TV ammaraanni oqaatsit allamiutoorpassuit tusarneqarsinnaapput. CNN tuluttut oqaluppoq. DR TV qallunaatut oqaluppoq. Allamiutut oqaluttorpassuit tusarsaapput, uagulli isumarput naapertorlugu, KNR-ip Radioani kalaallisut aallakaatitassiat annikitsuararsuupput, Lars-Emil Johansen oqarpoq, nangillunilu:

- Kipisaqattaarpallaartumik aallakaatitassioriaaseq tusarnaartut soqutiginninnissaannut annikillisaataasarpoq, Lars-Emil Johansen oqarpoq.

KNR-ip siulersuisuini qullersaanniillu aaqqiinissamik isummertoqartariaqartoq Lars-Emil Johansenip aamma ujartorpaa, nunanilli allaneersut nunatsinniittut siunnersuummi ajortumik isiginiarneqanngitsut erseqqissaatigalugu.