Lars-Emil Johansen folketingimut qinigassanngorteqqissaaq

Lars-Emil Johansen-ip folketingimi suliani ingerlatiinnarusuppai.

Folketingimut qinersinissaq qanilligunarpoq. Statsminister Anders Fogh Rasmussenip nutaarsiassaatai assigiinngitsunik oqariartuutillit qinersinissamut piareersarnertut isiginiarneqarsinnaalluartut, Danmarkimi tusagassiortut arlallit oqaatiginiarpaat.

Kulturimut ministeri Brian Mikkelsen sapaatip-akunnerata uuma ingerlanerani aamma nalunaarpoq, ukiami aggersumi qinersinissaq ilimanaateqarluarsinnaasoq.

Folketingimi ilaasortat arlallit qinersisoqarnissaanut piareersalereerput, soorlu partii Venstre aasaanerani naapinnermut atatillugu folketingimut qineqqusaarnissamut atatillugu Fredericiami allaffimmik pilersitsereersoq oqaatigineqarluni.

Folketingimi ilaasortap Lars-Emil Johansenip qinigassanngorteqqinnissi aalajangereerpaa.

- Namminersorneq pillugu ataatsimiitsitaliarsuarmi suliaq naammassillugu suliarerusuppara. Nunatsinni folketingimilu taasisitsineqarnissaa tamaat suleqataaffigerusuppara, Lars-Emil Johansenip qinigassanngorteqqinnissaminut peqqutigisani pingaarneq taama raadiuaviisimut oqaatigaa.

Nunatsinni folketingimi ilaasortaatitap aappaa IA-p siulittaasua Kuupik Kleist partiimi juunimi siulittaasunngornerminut atatillugu nalunaarpoq folketingimut qinigassanngorteqqinniarnani, qinersinissalli tungaanut ilaasortaaginnarniarluni.