Lars-Emil Johansen qaammatini tulliuttuni ulapputissaqassaqaaq. Aningaasaqarneq, nunanut allanut tunngassuteqartut, Naalakkersuisunut ilaasortaaneq tigummisarai, Folketingimilu aamma ilaasortaaginnarniarallarpoq.
Tassami Folketingimi ilaasortatut Lars-Emil Johansenip Siumumiit kingoraartissaa, Doris Jakobsen, Folketingimi ukiaru oktobari aallartilaarpat aatsaat aallartissagunarpoq.
Doris Jakobsen juunip ulluisa aallaqqaataanni Folketingimiilersussaagaluarpoq, ullorli aallartiffissaa manna nalorninartorsiutigineqalerpoq.
Doris Jakobsen Sermitsiamut ilisimatitsivoq, Lars-Emil Johansenip aperisimagaani oktobarip aallartinnerani, tassa Folketingi ukiaanerani ataatsimiilerpat, aatsaat aallartissinnaanerluni.
– Lars-Emil Johansen akivara aalajangernera ataqqillugu. Folketingimi ilaasortaanini aasaq naallugu ingerlakkusukkuniuk taamaalioriannguarli, Doris Jakobsen Sermitsiamut oqarpoq.
Namminersorneq pillugu Ataatsimititaliarsuarmi ilaasortaaginnarnissi Lars-Emil Johansenip kissaatigigaa taamaalilluni ersarissivoq, isumaliutissiissummi ataatsimiititaliarsuup ukiaru septembarip qaammataani tunniuttussaavaa. Namminersorneq pillugu Ataatsimititaliarsuaq tulliani ataatsimiissaaq juunimi, ataatsimiinneq Tasiilami pissalluni.