Lars-Emil Johansen folketingimi ilaasortaanerminit tunuarnialerpoq
-Siumut nuna tamakkerlugu ataatsimeersuarnerani saqqummiuppara, folketingimi ilaasortaatitaqarnerup unitsinneqarnissaa eqqarsaarigisariaqartoq, partiimilu oqallinneq ingerlaqqippoq, Lars-Emil Johansen aviisimi informationemi issuarneqarpoq. Kalaallit Nunaata folketingimi sinniisuutitaqarnera pillugu Dansk Folkepartiip partiillu Venstrep piffissami kingullermi oqaaseqartarnerat aallaavigalugu Lars-Emil Johansen taamatut aalajangersimavoq.
Danmarkimi nunasiniat jannuaarip qaammataani folketingimi taasissutigineqartussanngormata kalaallit folketingimi ilaasortaartitaat taasinermi aalajangiisussanngorput. Lars-Emil Johansen Juliane Henningsenilu Dansk Folkepartiinit qunusaarneqarput oqaaseqaqquneqaratik taamatullu naalakkersuisoqatigiinnit VKO-imit ilaasortat ilaanniit.
Lars-Emil Johansenip taamatut nalunaaruteqarnera Dansk Folkepartiimit qisuariarfigineqarpoq:
- Tamanna orulunerinnaavoq. Dansk Folkepartiip namminersorneq pillugu isumalioqatigiissitami ilaasortaatitaa Søren Espersen, Lars-Emil Johansenip nunatta folketingimi ilaasortaqarunnaartariaqarneranik oqaasianut taama oqarpoq.
- Pisarnermisut oruluvoq nimaarlunilu. Piumaguni Folketingimut ilaasortaajunnaaginnarsinnaavoq. Tassami ilaasortaaginnaqqullugu pinngitsaalineqanngilaq, kisianni ilaasortaanermini akissarsiani pinngitsoorsinnaanngilai, nutaarsiassaqartitsivik Ritzau naapertorlugu, Søren Espersen taama oqarsimanerarneqarpoq.