Lars-Emil Johansen: Finn Lynge inuuvoq imaannaanngitsoq piginnaasarpassualillu
- Aammali inuuvoq anersaakkut timikkullu imaannaanngitsoq piginnaasarpassualik, nunarsuarmi sumiluunnit innuttaaqataasinnaasoq aamma kalaaliunerminik sorlaqarfimminillu pingaartitsiuartoq. Avannaamiutut oqaatigalugu inuuvoq makorujuk, inuk imaannaanngitsoq sorpassuarnillu piginnaasalik. Partiit aporfiginagit sulianili tunngavigalugu ingerlasimavoq palasiugamilu upperisani nukittoqutigalugit ingerlasimavoq. Sorpassuarnut akuliuttarsimavoq qunuffeqarnanilu, Inatsisartut siulittaasuat Lars-Emil Johansen eqqaaniaalluni taama oqarpoq.
Finn Lyngep EF-parlamentimi 1979-imit 1984-imut ilaasortaanerata nalaani Lars-Emil Johansen Siumumi siulittaasuuvoq. Lars-Emil Johansen oqaluttuarpoq oqaatsinik assigiinngitsunik atuisinnaasumik nunatta EF-parlamentimi sinniisoqarsimanera tulluusimaarutigisarsimallugu. Finn Lynge piniartunik illersuinissamik EF-parlamentimi ilaasortaanermini aamma pingaartitsisuusimavoq.
- Nunatsinni pissutsit paaseqqullugit piniartoqarfinnut soorlu Qaanaamut angallassisarsimavoq, isumaqarpungalu suleqatigiit taakku akornanni sunniuteqarsimassaqisoq, Lars-Emil Johansen erseqqissaavoq.
Aamma oqarpoq Finn Lynge ikinngutissaminik akerassaminillu peqqissaarussilluni toqqaasarsimasoq, inuuneralu nalaatsornerinnarmik pisoqarfiunani aaqqissuulluagaasimasoq. Finn Lynge Folketingimi aamma ilaasortaatsiarsimavoq, tassani Siumut sinnerlugu ilaasortap Hans Pavia Rosingip sulinngiffeqarnerani ilaasortaatsiarsimammat.
Finn Lynge Kalaallit Nunaata Radioani pisortaasimavoq, tassanilu ataatani Kristoffer Lynge Kalaallit Nunaata Radioani pisortat siullersaata malinissaa pingaaruteqartissimagaa Lars-Emil Johansen naliliivoq.
Finn Lynge Danmarkimi nunanut allanut ministereqarfimmi nunarput pillugu siunnersortitut sulisimavoq kiisalu Bruxillesimi danskit aallartitaqarfianni siunnersortitut atorfeqarsimalluni. Taamatuttaaq Namminersorlutik Oqartussat Københavnimi allaffeqarfiani siunnersortaasimavoq minnerunngitsumillu Inuit Issittormiut Siunnersuisoqatigiiffianni avatangiisit pillugit isumalioqatigiissitami ilaasortaasimalluni.
Kingullertigut suliaasa annertuut ilagaat Namminersorneq pillugu Isumalioqatigiissitami 2003-p tungaanut ilaasortaasimammat.
Finn Lynge Namminersornerullutik Oqartussat nersornaasiuttagaanik sølvimik 1993-imi nersornaaserneqarpoq. Verdensnaturfondenimit, tassalu pinngortitamik avatangiisimillu illersuiniaqatigiiffimmit 2009-mi nersornaaserneqarpoq kiisalu Ilisimatusarfimmit siorna ataqqinaammik doktorinngortinneqarluni.
