Lars-Emil Johansen: Erngup nukinga nunarsuarmi mingutsitsinnginnersaavoq
- Nukissiuutinik ataavartunik Kalaallit Nunaanni maanna pilersitsiortuleruttorpugut. Kalaallit Nunaat erngup nukinganik nukissiornermik maanna pilersitsiortuleruttorpoq, taamatullu nukissiuuteqarneq nunarsuatsinni nukissioriaatsini mingutsitsinnginnerpaavoq, Lars-Emil Johansen Danmarkip Radiuani oqallinnermi ippassaq taama oqarpoq.
Taamaattorli erngup nukinganik nukissiuutinik qassinik Kalaallit Nunaanni maannamut sanaartortoqareerpa? Radioaviisimit Nukissiorfinnut paasiniarparput erngup nukinganik nukissiorfiit qassit manna tikillugu pilersinneqarsimanersut, aamma taakkua CO2-mik aniatitsinermut qanoq milleriartitsitigisimanersut.
Nunatsinni erngup nukinganik nukissiuutit maannamut pingasut pilersinneqareerput: Ataaseq Utoqqarmiut Kangerluarsunnguanni, ataaseq Tasiilami ataaserlu Qorlortorsuarmi. Taakkua saniatigut Sisimiut eqqaanni sanaartorneq aallartinneqareerpoq, 2010-milu naammassinissaa naatsorsuutigineqarluni. Ilulissani Paamiunilu sanaartornissaq siunertaralugu misissueqqissaartoqareerpoq, taakkunanili sanaartortoqalernissaa naalakkersuinikkut suli aalajangiiffigineqanngilaq.
Nukissiorfiit 2007-imi kisitsisaataanni takuneqarsinnaavoq, Qorlortorsuarmi nukissiorfiliornikkut CO2-mik aniatitsineq 10 procentimik minnerulersinneqartoq.
Sisimiuni nukissiorfik naammassippat, CO2-mik aniatitsinerup 15 procentimik minnerulersinneqarnissaa naatsorsuutigineqarpoq.
Nukissiorfinni ineriartortitsinermut siunnersorti, Jens Peter Bak Henriksen, oqarpoq, erngup nukinganik nukissiorfiit saniatigut seqernup, anorip qaqqallu iluata kissaa atorlugu nukissiorneq, mingutsitsinnginnerusumik nukissiorsinnaalernissamut misissuiffigineqartunut ilaasut. Taamaattorli taassuma erseqqissarpaa, Kalaallit Nunaanni CO2-mik aniatitsineq akikinnerpaamik sukkanerpaamillu millisinneqarsinnaasoq, innaallagissamik kiammillu atuinerup minnerulersinnerisigut, soorlu bilip uninngatiinnartarneratigut qulliillu qaminnissaasa eqqaamasarnerisigut.
