Lars-Emil Johansen annilaarnartoqarpoq

Taama allagaqarpoq Kalaallit qallunaallu Namminersorneq pillugu isumalioqatigiissitaanni konservativit sinnerlugit ilaasortaq, Per Ørum Jørgensen, aviisimi Berlingske Tidende-mi atuartartut allagaanni allagaqarluni. Per Ørum Jørgensenip Folketingimut ilaasortaq Lars-Emil Johansen periarfissaatillugu nunasiaateqarsimasunik pasilliuteqartarnerarlugu isornartorsiorpaa.

- Lars-Emil Johansen qiimasuuvoq silatullunilu, tamannalu ataqqivara. Taamaakkaluartoq Lars-Emil Johansen politikkikkullu isumaqatai peqatigalugit annilaarnartoqartippara, ingammik Danmarkimut uumisuttumik oqaluttariaasaa eqqarsaatigalugu.

Namminersorneq pillugu suliaq kalaallit politikeriisa saamerliunerusut pingaartinneruaat, inuiaqatigiit aningaasarsiornikkut toqqissisimaneq aalajaatsuunissarlu piumasarisaat salliutinnagu.

Kalaallit Nunaata aningaasarsiornikkut aqunneqarnissaanik Dansk Folkepartiip piumasaqartarnera, Lars-Emil Johansenip saamerlernilu suleqataasa aalassassimaarutigisarpaat, taamaalinerani Lars-Emil Johansen nunasiaataasimasutut inissisimanini atorluartarlugu, Per Ørum Jørgensen aviisimi Berlingske Tidende-mi atuartartut allagaanni allagaqarnermi ilaatigut taamatut allappoq.