Lars-Emil Johansen Aningaasanut Nunanullu allanut tunngasunut Naalakkersuisunngorpoq
Lars-Emil Johansen Aningaasanut Nunanullu allanut tunngasunut Naalakkersuisunngorpoq
Inuit Ataqatigiit naalakkersuisooqataajunnaarmata Siumut Atassullu nutaamik naalakkeruisooqatigiilerput. Inuiat Ataqatigiit siulittaasuat Josef Motzfeldt, Aningaasanut nunanullu allanut tunngasunut Naalakkersuisuusimasoq taarserlugu Aningaasanut nunanullu allanut tunngasunut naalakkersuisunngorpoq
Siumumeersoq Lars-Emil Johansen. Lars-Emil Johansen Siumut partiiannik aallarneeqataasimasutut ilisimasarput, nunatsinni ukiut ingerlaneranni politikkikkut inuussutissarsiornikkullu oqartussaaffinni pingaaruteqartuni annertuumillu akisussaaffeqarfiusuni aamma atuuffeqartarsimavoq. Sulisartut Højskolianni Royal Greenlandimilu ukiut ingerlaneranni pisortaasimanermi saniatigut politikkikkut atorfigisimasai makkuupput; 1991-miit 1997-imut Naalakkersuisuni siulittaasuusimavoq, tamatuma siuliani 1979-miit 1986-mut Inuussutissarsiornermut Ilinniartitaanermullu Naalakkersuisuusimalluni. 2001-miit massakkut naalakkersuisuni ilaasortanngornini tikillugu Folketingimut ilaasortaavoq, aammalu 1987-miit 1997-mut partiimini Siumumi siulittaasuusimalluni. Namminersorneq Pillugu Isumaliioqatigiissitarsuarmi aamma ilaasortaavoq.
Lars-Emil Johansen aperaarput Aningaasanut nunanullu allanut tunngasunut Naalakkersuisunngoruni sulissai siulliit suunersut:
- Politikkikkut suliakka allat tunukkallartussaassavakka. Folketingimi ilaasortaaninnit sulinngiffeqarniassaanga, Siumut Nuuk-milu siulittaasutut tunuarnissara ilimanarpoq, Namminersorneq Pillugu Kommisionemi suliaq sakkortuumik peqataaffigisara- qujanartumik taanna naammassilerami- suleqatigiiffimmi siulittaasuuffigisanni naggataartussagaluarpugut, ataatsimiinnerit tulliit marluk, taakkua allatut aaqqiiffigisariaqassapput. Kisianni suliat pingaarnerit naammassereerput tamaattumik naalakkersuiuunngornissamut akuersaarsimavunga.
Josef Motzfeldtip naalakkersuisuunermi sulia Lars-Emil Johansenip nanginniarpai.
- Tassa Naalakkersuisooqatigiinnerup tunngaviata annertunerpaartaatigut allanngunngilaq- naalakkersuisunulli ilaasortaata allanngornissaa siunnersuutigineqarpoq. Siornagut aningaasarsiornikkut ingerlatsinermut oqaaseqaraangama oqartarpunga, suna tamarmi pivallaarnagu aningaasaliiffissat siunissamut tunngasut, soorlu Nukissiorfinnut tunngasut, taakku attartornikkut aningaasalersuiffigineqarsinnaanerat periarfissarsiuuttariaqartoq BOT atorlugu aningaasalersuisinnaaneq tunngavissarsiuunneqartariaqartoq- tamakkuninnga periarfissarsiornissaq eqqarsaatigaara.
Aningaasalersueriaaseq BOT- tuluttoorlugu Build Operate and Transfer, tassaavoq aningaasalersueriaaseq, aningaasaliisut ukiut aalajangersimasut ingerlaneranni sanaartoriarlutik ingerlatseriarlutillu ingerlataminnik Namminersornerullutik Oqartussanut ingerlatitseqqiisarnissaannik imaqartoq.
