Lars-Emil Johansen aatsitassarsioqatigiiffimmi siulittaasunngorpoq
Aatsitassarsioqatigiiffiup australiamiunit pigineqartup Greenland Minerals and Energy A/S-ip Narsap eqqaani Kuannersuarni aatsitassanik qaqutigoortunik aatsitassarsiornissaq pilersaarutigaa. Kuannersuarni aatsitassat qaqutigoortut piiarneqarnerisigut Uran saniatigut tunisassiaralugu aatsaat pisinnaavoq.
- Taamatut sulinissamik akuersininnut pissutaavoq Namminersornerup eqqortumik imaqarnissaa peqataaffigiumagakku, Lars-Emil Johansen Atugagdliutini taamatut issuarneqarpoq.
Kuannersuarni aatsitassanik qaqutigoortunik nunarsuarmi amerlanerpaanik peqarpoq, teknikkimik atortorissaarutini atorneqartartunik.
- Pissutsit ajunngitsumik ingerlassappata Kuannersuarni aatsitassat kinguaariinni pingasuni tulliuttuni suliassaqartitsissapput, aningaasatigut nunatsinnut annertoorujussuarmik iluaqutaasussanik. Misissueqqaarnissamulli akuersissut manna tikillugu kisimi tunniunneqarsimavoq, Lars-Emil Johansen aviisimi AG-imi ullumi saqqummersumi tamaatut oqarpoq.